كريم الشركي-كود///
اليوم من المنتظر انه غايتعلن على التعديل الحكومي، وغايتبدلو فيه وزراء فالحكومة الاسبانية، لي كيقودها بيدرو سانشيث عن الحزب الاشتراكي، بمشاركة حزب بوديموس اليساري أيضا.
التعديلات غاتطال عدة وزراء إسبان، ولكن مابانش لحدود الساعة شكون غايطير من بلاصتو، رغم أن ارانتشا غونثاليث لايا، وزيرة الخارجية الاسبانية، هي أكثر وحدة مطلوب أنها طير من بلاصتها، لعدة أسباب.
ولعل أهم سبب انها هي لي شعلات الأزمة بين المغرب وإسبانيا، حقاش وافقات يدخل بن بطوش لاسبانيا بجواز سفر مزور وتعااجو فمستشفى حكومي على نفقة الدولة، وإلى جانب هادشي دارت الكثير من الاخطاء الديبلوماسية لي خلات احزاب اليمين الاسباني يطالبوا برحيلها، ويشوهوها فالبرلمان، خصوصا ان ديبلوماسيتها فشلات انها تحيد الجمود فالعلاقات مع أمريكا.
اسبانيا يلا كانت باغيا فعلا تصلح علاقتها مع المغرب، فهي غاتضحي بوزيرة الخارجية لي اصلا دارت ليهم عرام دالمشاكل، أما يلا كانت كتفكر بمنطق عدم الرضوخ للابتزاز، ومابغاتش تعفي الوزيرة من منصبها، فالازمة بين البلدين غاتزيد تكحال أكثر.