كود كازا ///

باش يوصل للمغرب لقاح استرازنيكا اوكسفورد ونكونو حنا اول بلاد فافريقيا غاديين نديرو لقاح لاكثر من مليون مغربي خدمات اجهزة كبيرة. خدمو ناس كثار. سفير المغرب فالهند محمد المالكي واحد من هادو.

تحرك وقنع وتلاقى مع لهنود اللي معروفين قاصحين فالتجارة وفالمفاوضات. المالكي كان دورو كبير فهاد العملية المعقدة الصعيبة فهاد الظروف

فالصين فشلنا فالتفاوض. فشلنا نجيبو التلقيح٬ حقاش السفير ديالنا فيها كان مريض واللي تكلف بالمفاوضات وهو الانصاري٬ مدير الشؤون الاسيوية فوزارة الخارجية والتعاون اللي هو صاحب ناصر بوريطة٬ ما فيدوش.

هاد السفير وصل لهاد المنصب بكفاءتو. ما عندو لا صاحبو لا شي حد يدفع بيه. بدا رئيس قسم بمديرية الشؤون الاسيوية فالخارجية. اللي خدمو معاه فالوزارة كيهدرو على ديبلوماسي مثقف ومتواضع. قبل هاد الشي كان ديبلوماسي فالهند وباكستان. تعين فمجموعة 75 سفير ايام كان وزير الخارجية هو صلاح الدين مزوار.

كيبعد على التجادبات اللي كثارت بزاف ايام هاد بوريطة.

دابا تخاف غير يبدا عليه وزير ما كيعجبو حتى شي ديبلوماسي كيهدرو عليه الصحافة من غير سيادتو.