سامي العلوي- گود كازا //

مزال هاد الشي ديال القضاء مغاديش يسالي ومزال فضايح جاية.

الوكيل العام للملك ديال محكمة الاستئناف بالدارالبيضاء (كوماناڤ) مگفض على دراعو وخدام بالليل والنهار من بعد الهزة لي ضربات القضاء فكازا  بسباب محتويات المكالمات والاديووات اللي تسربو.

مصادر “گود” أكدات ان الوكيل العام للملك بمحكمة الاستئناف بالدار البيضاء قرر إحالة نائب وكيل الملك بالمحكمة الابتدائية الزجرية بعين السبع على قاضي التحقيق فالغرفة الأولى فحالة اعتقال بتهمة تكوين عصابة إجرامية متخصصة في الارتشاء وتزوير محاضر رسمية والخيانة الزوجية.

هاد الخيانة الزوجية لي معنية بها عاملة نظافة خدامة فالمحكمة اعترفات قدام الفرقة الوطنية للشرطة القضائية بالدار البيضاء بانها مارسات الجنس مع هاد النائب حضوريا في المكتب ديالو فالمحكمة وحتى عن بعد فالواتساب.

مصادرنا قالت ان نائب وكيل الملك يشتبه فكونو كيتزعم عصابة متخصصة فالسمسرة في الملفات القضائية والتلاعب بالقرارات فالمحكمة ديال عين السبع لي اصلا كتعيش مشاكل من اللول ديال العام وجات ليها لجنة المفتشية العامة ديال المجلس الاعلى للسلطة القضائية.

في نفس هاد السياق ديما مصادر “گود” كتقول انه كاينة متابعة لنائب وكيل ملك ثاني على قاضي التحقيق فحالة سراح ومعه ضابط ديال البوليس وباشا وجدارمي قديم ومعهم حتى سماسرية.

وتجدر الاشارة الى ان التحقيقات لي جرات في هذا الضواصى كشفات ان نائب وكيل الملك المعتقل كان يقحم زملاءه دون علمهم في بعض الملفات الرائجة ويتكلم باسمهم دون علمهم، الامر اللي كشفته التحقيقات اللي باشرها الوكيل العام فهاد الضوصي.

هاد الفيلم مزال كاين فيه تحقيقات، والمصدر ديانا كيقول ان هاد التحقيقات اللي باشرتها عناصر الفرقة الوطنية لشرطة القضائية بكازا غادي طيح ناس اخرين في سلك القضاء، مضيفت انه غاتكون اعفاءات قبل ما تسالي العطلة القضائية.