كود علي الصافي العيون ///
قال قيادي من الاتحاد العام للمقاولات بالمغرب ل”كود” باللي ما فهمتش بيان حزب الاستقلال الاخير. القيادي اكد باللي قرار الباطرونا كان واضح. هدفو واضح. اللي بغى يدير السياسة ما يكونش قيادي فالاتحاد. ماشي اي قيادي ما يكونش لا رئيس الاتحاد ولا رئيس وحدة من 12 جهة تابعة ليه.
المصدر قال ل”كود” “من غير هاد المناصب اللي خاصهم يكونو لاناس غير متحزبين٬ باقي رؤساء الفيدراليات المكونة للاتحاد زيد عليهم اعضاء اخرين ممكن يكونو متحزبين
حزب الاستقلال كان حذر فالبيان باللي مما سماه “خطورة سعي الاتحاد العام لمقاولات المغرب إلى تعديل القوانين بهدف حرمان أعضائها الراغبين في الترشح من حقهم الدستوري في الانتماء السياسي الذي يكفله الدستور وجميع المواثيق الدولية تحت ذريعة الحياد، وهو ما يعتبر خرقا لمبادئ الدستور وعملا تمييزيا مخالفا للقوانين”.
واتهم الاتحاد بخوض حروب سياسي بالوكالة لفائدة حرب معين”. مصدر “كود” من الباطرونا رد على هاد المقطع بالقول “القيادة الجديدة غادية تخلي الاتحاد بعيد على السياسة. مهمتنا ندافعو على المقاولة. تكون عندنا نفس المسافة مع جميع الاحزاب مع جميع النقابات. للي وقع فالسابق ما غاديش يتكرر. ما يمكنش لشي عضو من الاتحاد يطلع لمجلس المستشارين ويمشي لشي حزب اخر. المجلس الوزاري الاخير الي ترؤسو الملك كان واضح فهاد الاتجاه وقرارنا الجديد تأكيد ليه”.
المصدر قال ل”كود” “غاديين نشوفو. ما غادياش تدخل السياسة للاتحاد فهاد المرحلة. ولا مشات حتى دخلات٬ راه الاتحاد كولو غادي يمشي”.
المصدر شدد ل”كود” على ان كاع قيادة الاتحاد العام لمقاولات المغرب اليوم ضد التوظيف السياسي وباللي ما غادينش يسمحو بيه
بيان الديوان الملكي بعد المجلس الوزاري الاخير كان هدر علي “مشروع قانون تنظيمي بتغيير وتتميم القانون التنظيمي المتعلق بمجلس المستشارين : وتتوخى التعديلات بصفة خاصة، الحفاظ للمنظمات المهنية للمشغلين الأكثر تمثيلية على فريق برلماني خاص بها داخل المجلس، وذلك بهدف تمكينها من التعبير عن انشغالات ومطالب الفاعلين الاقتصاديين والمقاولات الوطنية، الكبرى والمتوسطة والصغرى”.
