الرئيسية > آش واقع > مصدر رسمي وضح لـ”كود” صلاحيات جواز التلقيح: كيخول التنقل بين العمالات والأقاليم بلا مشاكل ولكن قبل الـ11 ديال الليل
26/07/2021 11:30 آش واقع

مصدر رسمي وضح لـ”كود” صلاحيات جواز التلقيح: كيخول التنقل بين العمالات والأقاليم بلا مشاكل ولكن قبل الـ11 ديال الليل

مصدر رسمي وضح لـ”كود” صلاحيات جواز التلقيح: كيخول التنقل بين العمالات والأقاليم بلا مشاكل ولكن قبل الـ11 ديال الليل

عفراء علوي محمدي- كود//

جدل كبير على مواقع التواصل الاجتماعي هذ الأيام على جواز التلقيح، واش كيخول السفر بين الاقاليم والعمالات فعلا أو لا، خصوصا من بعدما حبسو الجدارمية مجموعة من المواطنين الملقحين على الطرقات، وطالبوهم باداء غرامة 300 درهم، حيت ماعندهمش رخصة التنقل الاستثنائي، كيف اكدو ليهم أن جواز التلقيح ماكيسمحش بالتنقل.

هذ الواقعة اللي شهدوها مواطنين كثار خلقات لبس كبير عند الناس، وتناسلات بسبابها التساؤلات والفرضيات وحتى الإشاعات، بين اللي اعتبر ان الجواز ماعندو حتى قيمة، وبين اللي شاف ان الجدارمية فالطريق مافراسهمش بللي الجواز بمثابة رخصة للتنقل فكَاع المغرب، وبين اللي قال أنه خاص تدوز 15 ليوم على تلقي الجرعة الثانية باش يمكن الجواز من التنقل.

مصدر رسمي قطع الشك والالتباس باليقين، فحديثو ل”كود”، بحيث كشف أن جواز التلقيح مسموح اعتمادو للتنقل بين المدن والأقاليم والعمالات، لكن غير ففترة ما بعد الحجر الصحي، أي خاص اللي يسافر بيه يسافر فالنهار أو قبل ال11 ديال الليل.

وزاد المسؤول أنه ففترة الحجر، اي بين 11 ديال الليل و4:30 ديال الصباح، الجواز ماكيخولش السفر، إلا للضرورة، من خلال التوفر على رخصة للتنقل الاستثنائي، فالوقت اللي اللي ماكيتوفروش على الجواز مطالبين بالرخصة فكَاع الأوقات.

وكشف المسؤول أن الحكومة كتراهن على الذكاء الجماعي للمواطنين، حتى لو كانو ثغرات فبعض القرارات او التباس، بحال الإغلاق مع 11 ديال اللي مقابل إغلاق المحلات مع التوقيت نفسو، ففهذ الحالة مفروض مثلا على اللي كيسكن بعيد يسد قبل ويكون فدارو قبل هذ التوقيت، كذلك الشأن بالنسبة للمسافرين فالليل خاصهم يردو البال ويحترمو القانون.

وكانت الحكومة، ابتداء من الجمعة اللي فاتت، فرضات مجموعة من الإجراءات الاحترازية الجديدة للحد من انتشار فيروس كورونا المستجد، من بينها حظر التنقل الليلي على الصعيد الوطني من الساعة 11 ديال الليل حتى ل4 ونص ديال الصباح.

وبالنسبة للتنقل بين العمالات والاقاليم، فخاص ضروري إبراز شهادة التلقيح “جواز كورونا”، أو رخصة التنقل الاستثنائي.

موضوعات أخرى

19/03/2024 05:00

جورنال “الدايلي مايل ” بغا يحبس الشائعات لي كتسركل على الأميرة كيت: شهود شافوها كتدور مع راجلها وولادها

19/03/2024 03:00

مرض نادر كينتاشر فالجابون بطريقة كتخلع.. والعلماء مقدروش يعرفو الأسباب ديالو

19/03/2024 00:00

رابطة البوليساريو فالصبليون كضغط على وزارة الثقافة باش تحيد الاعتراف بمغربية الصحرا من الجريدة الرسمية ديال إسبانيا