سهام البارودي – كود//
ماعرفتش واش القدر ديال المغاربة انه مايبدعوش ! ماعرفتش شنو الاسباب لي كايخليو اغلب الاعمال التلفزية عيّانة بزاف و لا ترقى لمنافسة المنتوج الاجنبي !
هاد رمضان تبعت جوج مسلسلات واحد مصري وواحد مغربي ! المصري ” بطلوع الروح” كايعاود قصة كوبل مشا يعيش فدولة الخلافة فالعراق و الشام و فاش كانتفرج فيه كانحس براسي منغامسة فالفيلم و مأثرة مع الشخصيات لدرجة فاش ماتت واحد الشخصية دمعّت عليها و بقات فيا ! كانتفرج بنهم ! حتى الجينيريك كانسمع ليه و ماكانبغيش الحلقة تسالي و الى شي نهار ماسهرتش باش نتفرج و نعست بكري كانفرح بزاف حيت لاغدا ليه كانكون جمعت جوج حلقات نتفرج فيهم عوض حلقة وحدة ! ممثلين واعرين كاتحس بيهم لابسين الشخصيات لا منة شلبي لا أحمد السعدني لا جميع الممثلين ! السيناريو متقون ! الحوار كاتحس بيه واقعي ! أمّا الاخراج فراه يا سلام ! المسلسل كلّو تحفة و كل حلقة كانحس بمتعة كبيرة وانا كانتفرج فيها!
بالمقابل فاش كانجي نتفرج فالمسلسل المغربي لي هوا ” المكتوب” كانلقا راسي غير كاتبدا الحلقة كانبدا نخاصم واش هذا تمثيل دابا ؟ واش هذا حوار هذا ؟ واش دابا هادي طريقة د التصوير هادي ؟! و ماعرفتش واش كانتفرج كنوع من جلد الذات و لا نوع من المازوشية و لا شنو بالضبط ! ولكن ماعندي ماندير انا كانبغي نتبع المسلسلات المغربية و كانبغي نسمع الدارجة !
ولكن للاسف ! المسلسل ككل راه ضعيف بزاف ! مسلسل داير فحال الباري سان جيرمان كاتحس بيه جامع ممثلين نقيلات واعرين فحال الناجي و مريم الزعيمي و بوطازوت و لكن بأدوار ضعيفة و قصة اضعف و حوار ماعندو لا ساس والا راس !
مسلسل كايصور لينا حياة عائلة برجوازية ماكاتشبه لحتى شي عائلة برجوازية فالمغرب ! عائلة ” المعطاوي ” لا فحياتها لا فطريقة عيشها لا فحواراتها ! أمين الناجي ماجاش معاه دور رجل برجوازي رباطي بديك اللكنة ديالو الكازاوية و الطريقة باش كانطق التاء تشاء !
مريم الزعيمي ماعرفتش شكون قاليها بلي البرجوازيات ماكايديرو تا خصية فحياتهم من غير يجلسو فوق الفوطوي و يشربو لاتيزان و يهضرو بطريقة كاتشبه لفحيح الافعى ! شخصية كانشوفوها ماعندها مهنة ما عندها صديقات ماعندها ذكريات كاتشوفها كاتجيك نوبة قلق ! و هادشي ماشي غير بالنسبة للشخصية لي مثلاتها مريم الزعيمي گاع الشخصيات غير ملبقين! سكينة درابيل كاتخرج عينيها اكثر ماكاتمثل و رفيق بوبكر كاتحس بيه فعلا جاي يضرب بريكول كيما قال فحوار صحفي و صافي !
قصة عائلة رباطية ماكاتشبه لحتى شي عائلة من العائلات الرباطية العريقة ! ماكاتشبه لا لعائلة بلافريج والا برگاش و لا فرج … الشبه الوحيد هو الشيخة حليمة. البورجوازية المغربية خاصة الرباطية عندهم هاد الشيخة هي المفضلة عندهم بصاح. فالمسلسل دنيا بوطازوت لعبات دور شيخة بنفس الاسم. الشيخة حليمة ديال بصاح ماشي بحال فاطنة بنت الحسين ولا الحاجة الحمداوية.. شيخة رباطية.
الممثلين المغاربة مازال الاغلبية الساحقة فيهم غي سامعة بالبرجوازية ماكاتعرفش تمثلها و كايصحابها بلي تابورجوازيت هي التفلعيص و الفرونسي المخضرة باللفت ! القصة عامرة كليشيات ديال الاغنياء لي واخا عندهم الفلوس كايعيشو فالمشاكل و اشرار و كايبغيو غير راسهم و بالمقابل الفقراء ضريفين و زوينين و عندهم اخلاق و مبادئ كايدافعو عليها! ماكاينش احداث قوية ! ماكاينش تسلسل فالحلقات ! ماكاينش بناء حقيقي د الشخصيات ! مسلسل ثقيل ثقيل ثقيل !
اه قبل ماننسى ! المصور ! كارثة ! كايشد الممثلين من ودنيهم واش عمركم شفتو شي ممثل مصور من ودنيه ؟! ايوا هانتوما شغتوه دابا!
المسلسل مخسور عليه الفلوس وي ! ولكن القصة ديالو ككل مملة ! ماكاتشدكش ! ماكاتقنعكش ! كاتخليك ديما كاتفرج و هاز هراوة خيالية مستاعد تشير على التلفزة فأي لحظة تسكت ليها الحس. مسلسل فايت شفنا قصتو فشي مسلسل اجنبي. فايت شفنا احداثو. عليه كيجي هاد الملل
