هشام نوستيك-كود//

اللبناني هزنا فالمرسيديس الفاخرة ديالو، وصلني لبيت الله، ثم دا علي يوصلو للحي الجامعي. علي دارها زوينة ما طلقش البيت ديالو تما، وقدر يرجع ويكمل قرايتو، ودبا راه دكتور كبير.. لا والله ما عرفت شنو دار من بعد، حيت نقاطع الاتصال بيه. كاين جوج إمكانيات، يا إما كمل قرايتو ونجح، أو مشا فرقع مصارنو فشي عملية إرهابية فشي قنت.
توحشت الجامع، واخا الغبرة كانت قصيرة. الجامع ولى بحال دارنا. كون كان إنسان كون عنقتو.

حليت الباب، السلام عليكم، تا واحد ما تايجاوب. دخلت ضربت دويرة، والو، الجامع خاوي. مشيت حطيت حوايجي فالركنة لقديمة، بديت نشوف فالخشية ديال ال VIP وتنضحااك مع راسي، واش عندي دابا الحق نبدا ننعس هنا من بعد المشية للبوسنة؟
جلست حدا المكتبة، خذيت “الجواب الصحيح لمن بدل دين المسيح” ديال شيخ الإسلام إبن تيمية. من نهار مشيت، تا واحد ما فتح الكتاب واقيلا. باقة العلامة للي خليت فيه هي هي. هاد الكتاب كنت تانترجمو للألمانية، حيت ما تفهماتش ليا كيفاش كتاب بهاد الأهمية ما مترجمش. كتاب فيه التشريح الكامل ديال “النصرانية”، إبن تيمية ما خلا تا سؤال إلا وعطا أجوبة فيها سبعة أوجه وعشر مسائل وخمس نقاط وأربعة أبواب وست آراء وزيد وزيد.. كنت أعتقد أن أي ألماني يقدر يسلم يلا قرا الترجمة الألمانية. نسيت بأن كاين الملايين ديال المسيحيين العرب للي ما يحتاجوش الترجمة، وما غا يسلموش بسبب لْهِيت ديال الشيخ. المشكل ماشي فاللغة، المشكل في الفهم الإسلامي للمسيحية، ولكن هذا موضوع غا نعيشو عن قرب من بعد، ماشي بلاصتو هنا. الجلسة فالجامع رجعاتني بالزربة للروتين لقديم، نْسَّاتني التفكير فالمستقبل. الجامع ولى فعلا الحضن للي تاترجع ليه باش تحس بالأمان.

غرّْقت فالنصرانية مع ولد تيمية تا بداو لخوت يبانو، الظهر قْرّْب، أول واحد جا هو جمال الجزائري، شافني مسكين جا تايجري عنقني وعينيه فيها الدموع. ما كانش تايسحابني أنا عزيز عليه لهاد الدرجة. من بعد جا مصطفى، تا هو سلم عليا بحرارة، ولكن شي حاجة ما كانتش هي هاديك، كان شوية ديال التمثيل أو شي حاجة مديرونجياه – مقلقاه.

الجامع بدا يعمر ، حيت السبت، كلشي تجمع عليا، ردوني بحال لحلايقي، شي تايسول على المجاهدين، شي تايسول على أبو حمزة، شي تايسول على البوسنة والطريق. تزادت فيا ضلعة بالاحترام – الجديد – ديال الناس، وليت دابا فالكاتيغوري ديال قدماء المحاربين وأعضاء جيش التحرير. صلينا الظهر، عبد الفتاح ما بانش ليا

–          فين عبد الفتاح؟

–          رجع للشارفة

–          أوَّاه؟!

–          إيه مشا عندها، تصالحو

بداو يعاودو ليا شلا أخبار، تقول كنت عشر سنين فالمنفى، ها للي طلق، ها للي تزوج، ها للي رحل، ها للي قرقبو عليه لخضورة – البوليس – سيفطوه.
وجوه جديدة ولات تبان فالجامع، منهم واحد البوسني شارف، تعرفت عليه ووليت عزيز عليه مين عرفني كنت فالبوسنة. كنا تانعيطو ليه حاجِّي. واش سميتو ولا غير زعما عمي الحاج، ما نعرف.

حصلت على ترقية كبيرة فعلاقاتي “السوسيومسجدية”، ما بقيتش مجرد “ساكن فالجامع”، أصبحت من الأعمدة الأساسية، تزادت عليا المسؤولية، بديت ننظم تا أنا حلقات تجويد القرآن، وتانحاول نجاوب على الأسئلة ديال الناس فالدين، بحال يلا زعما المشية للبوسنة تاتردك دكتور فالشريعة. مع ذلك، الإحساس بالحب والاحترام ديال الناس كان مهم بالنسبة لشاب بحالي مازال ما كملش عشرين سنة. علمني نكون منضابط، ونطبق داكشي للي تاننصح بيه الناس.

مع الوقت الحياة الجديدة خذات المجرى ديالها، نسيت البوسنة والبيكوب والكواش. الأخبار للي وصلاتنا من بعد، حيدات ليا أي شك فأن قرار العودة كان سليم 100%. شْبْكات مطايفة وخشونة مع البوسنيين، تقتلو ناس كبار فالقيادة د المجاهدين، وشحال تشدو فالحبس وروينة ناضت. أنا بعدة للي عليا درتو، هذا جهدي عليك أ سيدي ربي!