عفراء علوي محمدي- كود//
من بعد ما خرجو تجار التيليفونات فدرب غلف فكازا لوسائل الإعلام، كيحتجو على حجز عدد كبير من تيليفونات “أوبو” من نوع “فاين إكس نيو” كانو عارضينها للبيع، بلا ماياخدو عليها حتى تعويض، خرجات الشركة توضح آش وقع بالضبط، وقالت ان هذ التيليفونات “مشفورة” و”دخلات للسوق المغربي بشكل غير قانوني”.
وزادت “أوبو – فرع المغرب”، فبلاغ ليها حصلات عليه “كود”، أن ملاك هذ السمارتفونات المشفورة، اللي كيبلغ عددها 3000 تيليفون، حطو شكاية للبوليس الأوروبي، وطالبوهم باش يتبعو السلع والمكان اللي كاينة فيه، وهكذا البوليس فالبلاصة عيط للبوليس فالمغرب باش يتاخدو الإجراءات اللازمة فهذ لافير، وهوما بدورهم عيطو ل”اوبو” باش يعاونوهم، ويديرو أونكيط.
ووضحات الشركة أن هذ التيليفونات تشفرو فأوروبا، ودخلو للمغرب بشكل غير شرعي، والبوليس تحققو أنهم ماجايينش عن طريقها أصلا، بحيث أن “هذ الموديل بالضبط عمرو ما وصل أو تباع فالسوق المغربي”، حسب تعبير الشركة.
وهكذا، حسب الشركة، البوليس المغربي قرر حجز هذ السلعة دالتيليفونات، لكن فالمقابل لا الشركة ولا ختى طرف آخر ما تابع هذ التجار أو حط ضدهم شكاية، باعتبارهم ماعندهمش دخل فهذ الشفرة اللي وقعات.
واليوم الثلاثاء، تجار كثار فدرب غلف احتجو وغوتو فوسائل الاعلام، ولاحو البانوات ديال شركة “أوبو” فالطارووات دالزبل، من بعد ما تحجزات السلعة ديالهم، ومافهموش علاش وشنو السبب.
