سعيد الشاوي – كود ///
صباح اليوم لاربعا 8 شتنبر بدات عملية التصويت. الاعداد كانت قليلة فثانوية ولادة بتقاطع زنقة الشرسي وعلي بن عبد الرازق فعمالة مقاطعات الدار البيضاء انفا فكازا. مع التسعود تقريبا كان ممثلي الاحزاب ومسؤولي مكاتب التصويت للي عددها حوالي عشرة مكاتب٬ هما اللي دايرين الرواج. الناخبين ما فايتينش العشرة فكاع هاد المكاتب اللي غاديين يبقاو مفتوحين حتى السبعة فالعشية.
غالبية هاد المصوتين من 40 عام وما فوق. فهاد الثانوية كان كيصوت ديما الراحل عبد الرحمان اليوسفي. هادي اول انتخابات دارت بعد رحيل الوزير الاول السابق.
امام المكتب كان رجال من السلطة وبان عبد اللطيف معزوز وكيل لائحة حزب الاستقلال بهاد الدائرة. السيد جا وجاب معاه مصورين صحافيين. عندهم البطاقة المهنية ولكن ما خلاتهم السلطة يدخلو. بلا ما يعطيوهم سبب او يقولو ليهم شي حاجة. هاد الشي عبثي ديال نعطيك اعتماد تغطي الانتخابات واخا انت عندك البطاقة المهنية للصحافة. شرح ليهم مصور صحافي مهني ووالو ما بغاوش يخليوهم يخدمو. جاو باش يصورو الاجواء والمرشحين. فاقو بكري على والو. جا شي مسؤول سلطة وقال ليهم عطيوني اسماءهم. جاوبو المصور المهني: ايلى ما ندخلوش نديرو خدمتنا علاش بغيتي هاد الاسماء. رد عليه “غير نعرفو” ثم اضاف “راه حنا كنتاصلو بالولاية باش نشوفو واش يخليوكم ولا اللا. هاد الشي واخا مسؤول فالتواصل فوزارة الداخلية كيقول باللي اي صحافي مهني يقدر يصور شريطة الادلاء ببطاقتو المهنية ويحتارم التدابير الاحترازية. الصحافيين اللي شافتهم كود احتارمو هاد الشي ولكن السلطات فهاد الثانوية منعوهم يديرو خدمتهم.
المهم هاد الرواج اللي كاين فباب الثانوية هرس الاجواء اللي بدات بيها هاد الانتخابات.
داخل مكاتب التصويت كتحس بكلشي متحمس. كيتعاونو بيناتهم باش تعطيهم لاكارط ناسيونال حتى دوز تصوت. المكتب 279 كانو فيه ناس مرحين عزيز عليهم ينكتو. طبعا باش كيجي شي مصوت ويهدر معاهم. كيدخلو واحد بواحد باش ما يتلفوش. بطاقة التعريف الوطنية اساسية فهاد العملية كيف قال بيان البارح لوزارة الداخلية.
فهاد العدد لقليل من الناخبين كان راجل هاز لاكارط ناسيونال ولابس فوقية وداير لكمامة على گادومتو وكيسول على المكتب اللي غادي يصوت فيه. وقف معاه ناخب اخر وبدا كيقلب فموقع وزارة الداخلية الخاص بالانتخابات باش يعرف المكتب. حداه كانت سيدة انيقة كتسول حتى هي على المكتب وما فراسها والو. كتعيط غالبا لراجلها. من بعد حتى هي شافت الراجل كيقلب فالموقع وهي دخل المعطيات ديالها.
كاين تبابن بين المعطيات اللي كترسلهم 2727 وبين اللي كيعطيهم موقع الداخلية. مواطن عطاوه مكتب 286 اللي ما كاينش اصلا فهاد الثانوية وباش قبل الموقع لقى مكتب اخر وصوت ومشى. هاد الشي ممكن يدار دابا باش الاقبال قليل بزاف. كيفاش غادي يكون الامر فحالة ايلى كان الاقبال كبير. غادي يولي مشاكل اكثر.
هاد المكتب يمكن ما كيمثلش مكاتب اخرى فالمغرب. لكن للي بان ان كل واحد مقابل شغلو. السلطات: المراقبة وحماية المكاتب امنيا والاشراف داخليا على العملية والمراقبين الممثلين علي الاحزاب حاضيين شغلهم. غير فالصباح بان لي للي خدام اكثر هما السلطات. ممثلي الاحزاب كاينين برا المكاتب مريحين. شي وحدين جاهم الجوع مع التسعود: عيط عيط على ماهر =ماشي الصحافي طبعا= يجيب لينا سندويتشات. قال احدهم كما سمعت “كود”.
العملية بادية بشوية وبهدوء. الساعات المقبلة نعرفو اش غادي يوقع…
