كود هناء ابو علي ///
يدلي الاسبان في عدة مناطق يوم الحد اللي جاي 26 ماي فانتخابات بلدية من غير الانتخابات الاوربية. هاد الانتخابات البلدية وفق الدستور الاسباني والقوانين الاوربية كتسمح للمقيمين الاجانب بطريقة قانونية بالمشاركة فيها بشرط واحد وهو المعاملة بالمثل اي ان مواطني هاد الدول خاصها حتى هي تسمح للاجانب =الاسبان= اللي فيها بالتصويت.
فاسبانيا كاين الفصل 13 من الدستور فيه “يتمتع الاجانب في اسبانيا بنفس الحريات العامة التي يضمنها هذا الجزء طبقا لما تنص عليه المعاهدات والقانون. لا يتمتع بالحقوق الواردة في الفصل 23 الا الاسبان٬ باستثناء ما قدم يتم التنصيص عليه بمقتضى معاهدة او قانون بشأن حق التصويت في الانتخابات البلدية والترشح لها مراعاة لمعايير المعاملة بالمثل”.
والفصل 23 من الدستور الاسباني كيهدر على الحق في تدبير الشؤون العمومية للمواطن الاسباني والحق في التصويت”.
وعليه فالاجانب اللي عندهم الاقامة وكاينة اتفاقية مع بلدانهم وعندهم الحق فالتصويت فاسبانيا وفق يومية “الباييس” يالله 470 الف من اصل 5 مليون اجنبي. هاد الاجانب ينتمون الى بوليفيا والرأس الاخضر والشيلي وكولومبيا وكوريا الجنوبية والاكواتور واسلندا وترينيداد توباكو والنرويج ونيوزلندا والباراغواي والبيرو.
ولكن علاش لمغاربة مستثنين؟ لمغاربة كيشكلو الجالية رقم واحد فاسبانيا. كاين مليون مغربي فاسبانيا فيهم 800 الف مقيم بشكل رسمي وشي 200 الف مازال ما صابوش لوراق ومحسوبين على الحراكة. يعني كتلة انتخابية كبيرة قادرة تلعب دور فالحياة السياسية الاسبانية.
واش الديفو من المغرب اللي ما كيسمحش للاجانب يصوتو فالانتخابات البلدية وعليه مقصي بسباب “المعاملة بالمثل”؟ اللا المغرب كيسمح للاجانب يشاركو فالانتخابات البلدية. هاد الشي جا فالدستور الجديد. الفصل 30 منو واضح.
فيه “يتمتع الاجانب بالحريات الاساسية المعترف بها للمواطنات والمواطنين المغاربة وفق القانون” وفيه ايضا “يمكن للاجانب المقيمين بالمغرب المشاركة في الانتخابات المحلية بمقتضى القانون او تطبيقا لاتفاقيات دولية او ممارسات المعاملة بالمثل”.
دابا اللي خاص هو التفعيل. كاين يالله شي 8500 اسباني مقيم فالمغرب. يعني العدد قليل. دابا اللي ناقص هو التفعيل. كاين انعقاد اللجان العليا المشتركة وهي اللي خاصها ديرها فجدول الاعمال باش يتم المصادقة عليها بين الدولتين.
اسبانيا وفق خبير متابع للشان الاسباني ل”كود” ماشي فصالحها تزاد هاد الكتلة الناخبة والاحزاب كاع ما كتهدر على هاد الشي. حتى الدولة المغربية ما هامهاش بزاف. حقاش ما دارت والو من 2011. ما دارتش الاجراءات القانونية باش دخل حيز التنفيد الفصل 30 من الدستور حقاش فيه المعاملة بالمثل حتى هو.
تصويت لمغاربة يقدر يكون ضد السياسة الخارجية للدولة. مثلا يقدر يلقى عدد كبير منهم فخطاب اليسار الراديكالي بوديموس نفسو. كيدافع على المهاجرين على السكن على تحسين ظروف هاد المهاجرين على رفع السميك. لكن سياستهم الخارجية كتدعم البوليساريو ضد المغرب. يعني هاد الكتلة الناخبة تقدر تولي بومزوي للمغرب.
