كود كازا//

جائحة كورونا غادي تعود بالنفع على المهاجرين اللي معندهمش اوراق الإقامة او قربات تسالي ليهم. الحكومة الإسبانية صدرات قرار باش تعطي لوراق للمهاجرين اللي قربات تسالي ليهم الإقامة و تمنح اوراق الإقامة و الشغل للمهاجرين الي تيتراوح عمرهم مابين 18 و 21 عام.

هاد العينة تتخص القصر المهاجرين و اللي اغلبهم مغاربو و كانو تحت كفالة الحكومات الجهوية حتى لسن 18 سنة. و لكن هاد لوراق ماشي فابور. المستفيدين خصهم يشتاغلو فقطاع الفلاحة اللي عندو خصاص كبير فاليد العاملة و السبب هو غلق الحدود مع المغرب.

فخلال الندوة اللي شرح فيه هاد القرار، لويس بلانس وزير الفلاحة الأسباني قال أن هاد الخصاص سبابو المغاربة اللي مقدروش يجيو بسبب حالة الطوارى الصحية فالمغرب. و اضاف بلانس بان هاد القرار السيادي ديال المغرب حرم الحقول الأسبانية من العمالة المغربية. اسبانيا تتقدر هاد الخصاص بخوالي 80.000 عامل فلاحي.

و بخصوص المياومات المغربيات الي تيخدمو فالفريز فويلفا، الوزير الاسباني قال بلي راهم حاليا 6000 مياومة مغربية و تم التجديد ليهم فعقود الشغل باش يبقاو حتى لنهاية الموسم الفلاحي و يعاونو القطاع الفلاحي الاسباني.

ايوا دابا هادوك المهاجرين اللي تعفر عليهم فوكس و عايرهم حتى شبع خلال الحملات الإنتخابية و بغا يحرمهم حتى من التطبيب ملي بدات كورونا هوما اللي غادين يعاونو إسبانيا باش تضمن التزويد بالمنتوجات الفلاحية خلال حالة الطوارئ.