محمد سقراط-كود///

أي مغربي عارف أن السبيطارات ديال الدولة مقودة عليهم في الكثير من الحالات، وأي مغربي عندو مناش فراه مكيفكرش جوج مرات باش يمشي ديريكت للقطاع الخاص، سبيطارات الدولة بحالهم بحال مدارسها كيبقاو هوما الحل الأخير للمغاربة، وبحكم أن في الغالب غير المظطرين هوما لي كيمشيو لسبيطارات الدولة فراه غير ألى دوزو بيخير وعلى خير ودارو عملية او تعالجو مزيان وبأقل التكاليف فهذاك هو الربح عندهم، ومعروف عند المغاربة أن ماكلة السبيطار قود من ماكلة الحبسن وأنك الى لقيتي فراش فين تنعس راه ماقدك حد، وأي مغربي كيمشي لسبيطار الدولة راه كيوجد معاه لغطاوات ديالو وماكلو كيجيبوها ليه عائلتو المهم كيحاول تتقاصر الخدمات لي يوقف عليها فالسبيطار على العلاج فقط، داكشي لاخر كيساهم بيه من عندو، بالإظافة الى صريف يكون ديما حاضر فجيبو باش يرش هنا ولهيه إلى بغا يتفكروه واش كاين، وطبعا كاين لي معدنوش حتى هاد الكماليات وكينعس فديك الحالة وياكل ديك الماكلة ويكمدها ويصبر.

فيروس كورونا ولد لحرام خللى الناس لي عمرهم شافو سبيطار الدولة يدخلو ليه ويتعالجو من أخطر الفيروسات، الناس لي مولفين بسبيطارات الدولة راه جاهم داكشي عادي، ولكن كاين ناس أجانب بحال الفرنسية وراجلها الحسين لي كانت فاللول محطوطة في غرفة مافيها مايتشاف وجايبين ليها فالفطور جوج فرماجات، عاد من بعد حولوها وحاليا تعافات وكتشكر بزاف الطاقم الطبي لي نقذ حياتها ولي كيخدم فظوروف كي الزفت، وشفنا فيديو السطات ومن بعد تبعو فيديو بنت خرى فمراكش ولكن الكارثة العظمى هي مغربي بريطاني في مراكش في أوضاع لا إنسانية والسيد بيخير عليه ومامولفش يتعامل كي الحيوان، وهو لي عاش رفقة التون جون وعدة مشاهير، تلات بيه ليام حتى لقا راسو كيتعالج من كورونا في المغرب وكيخرى فكرطونة حيت الغرفة بلا طواليط والفيروس مسبب ليه إسهال.

هادشي لي طرا لهاد الناس ولي عاودوه كلو عارفينو ومتوقعين أنه غادي يطرى حيت هاداك هو الّأصل في السبيطارات العامة، ومشاكل بحال هاكة راه واقعة في العالم وحتى فالدول المتحضرة ولي لاباس عليها بحال النكليز نيت، لي هادي سيمانة تاصلات مواطنة نكليزية وأم لتلاتة اطفال بالإسعاف وقالو ليها راها ماشي أولوية حاليا ولغد ليه ماتت، وحالات بحال هاكة غادي تلقاهم في العالم لأن النظام الصحي مكلف والدول سنوات هادي وهي كتنقص التكاليف ديالو والنتيجة راه كيبينها كورونا، هادشي جاري بيه العمل وحنا كمغاربة كنا مولفينو ولكن حاليا راه كنعيشو جايحة  وصعيب نصلحو قطاع الصحة وسطها بل الرهان هو يتم المحافظة عليه من الإنهيار، ولكن من بعد هاجشي الى بقينا عايشي نراه خاص يتعاد النظر فشلا امور ومنها وزارة الصحة.