كود ياوندي ////
كاينة رحلة من كازا لياوندي مباشرة. فالمغرب كانت كتبان لينا غادية. نهار تفكر تمشي للكاميرون غادي تفهم باللي كلشي الا عادية.
لارام » تخلات على كليانها. هانتهم باش الدولة ديالها سدات حدودها بطريقة غبية. سداتها على الخوا الخاوي. اليوم « اوميكرون » اللي كذبو علينا وسدو لبلاد علي قبالو كيمثل 70 بالمائة من المصابين عندنا. القتلى ديالو كترتافع وحالات الانعاش وصلات ل150 والاصابات ما نهدروش. مطلية الدنيا.
هاد الشي كولو باش نقولو باللي اغلاق المغرب لحدودو ضر هادوك اللي كانو كيسافرو لافريقيا عبر مطاراتنا. مثلا ما كايناش رحلة من مدريد حتى للسنيغال ما بالك بياوندي. فالسابق كانت كديرها « ايبيريا » مع « لارام ».
فافريقيا ما كايناش رحلة مباشرة من السينغال والكاميرون. فرحلة «كود » كانت من داكار لابيدجان ومن ابيدجان لياوندي.
كتوصل مع لطناش ونص الليل مادام زايدة ساعة على السينغال. فالرحلات بجوج كيوصلو ل4 سوايع ونص تقريبا. على حساب الحالة الجوية.
فياوندي وفهاد الوقت المتاخر بالليل كانت درجة الحرارة 28. واييه 28 فهاد الوقت. توصلت باللي فالنهار جهنم « الجو عند هاد لبلاد للي هي بلاد الغابة » ماشي خايب كيف كيتقدر تعتاقد. فالصباح كاين غربي زوين. كتبدا الحرارة وبعد الظهر كتحرك رياح زوينة وفالعشية الحرارة تقدر تطلع » يشرح ل »كود » مغربي من 300 واحد عايشين فهاد لبلاد.
المطار كولو نشاط. كلو احتفال بالكان. كيبان ليك كلشي منظم. غير كيبان وصافي. باش كتوصل كيشوفو التيكي ديالك. هاد الشي راه قبل ما تدخل كيشتارطو « الباس ڤاكسينال » وتيست « بي سي ار » طبعا نيگاتيف وباش توصل بعد ما دوز من جوج كونطرولات ما عندهم مبرر٬ كياخدو ليك الباسبور ايلى ما عندكش الڤيزا فيه. وكتمشي دير «تسيت انتيجين ». تماك كياخدو ليك عينة من نيفك وكتسنى النتيجة. كاع اللي كان فالرحلة عيطو عليهم. يعني انهم نيگاتيف. من بعد كتوقفك وحدة من الصحة. ما كتسولك لا على الباس فاكسينال لا على التيست لا والو. كتسولك على ڤاكسان واخا تكون دايرو تقدر تنسى الوثيقة وهي ديال الحمى الصفراء. ايلى ما عندكش تسنى وتخلص وتمشي فحالك.
فالمطار كلشي مزوق ومحتالف بالمونديال الافريقي. دايرين بحال اعياد الميلاد. بالونات بالوان الكاميرون وملصقات والرئيس بول بيا هاز الكورة وفشي لافتات كاين حتى الرئيس الجديد للجامعة الكاميرونية لكرة القدم صامويل ايطو.
فمطار ياوندي كانت المفاجأة: جوج طيارات بوينك كبار ديال لارام. وحدة فليمن ولخرى فليسر. اواه اش كيديرو هادو هنا؟
كيفاش الحدود مسدودة واللي بغى يجي من المغرب لياوندي خاصو يمشي حتى لتركيا ايلى ما كانش عايش فاوربا او ما عندوش فيزا شينگن. وحتى فهاد الحالة كاين التسخسيخ. حسب ما جمعاتو « كود » هاد الطيارات كارگو جايبين اش محتاجو المنتخب المغربي. كلشي كلشي. حتى اللي كيصايبو ويقادو ليشامبر. « فام دو شامبر » جاب المنتخب ديالو. ما بغى يكون عندو حتى احتكاك مع عمال لوطيل ويقدرو يعاديهم بكورونا. الماكلة من المغرب. لفراش من المغرب. الاطباء من المغرب. كلشي كلشي.
كان من الممكن تكون رحلات يجيبو هاد الشي ومعاه على الاقل الصحافة الرياضية. لكن هاد الحكومة مضروبة بفليطوكس. هي اللي سادة كلشي.
المهم كانت الخطوط الوحيدة يمكن من غير ديال لبلاد اللي عندهم جوج طيارات وكبار اللي واقفة فالمطار وبعد شوية بدات تحرك. راجعة للبلاد.
هاد الشي اللي دار الوفد المغربي جبداتو الصحافة المحلية.
ياوندي مدينة عندها مساحة كبيرة. واخا سكانها 2 مليون و700 الف نفس تقريبا راه شادة بزاف. حقاش ما عندهمش العمارات. هاد ياوندي جات بين 7 الهضبات =بعضها كيسميوه جبل=. خاصك تكون صبار بزاف باش تحرك فيها. من الصباح كلشي عامر. كلشي مضروب. صحاب الطونوبيلات كيسوكو فاغلبيتهم بطريقة كتزيد تعقد نظام السير . لماطر كيدوخوك.
ايلى كنتي صگع تمشي مع شيفور مسلم نهار الجمعة مع لطناش. كيقرب صلاة الجمعة وكيدخلك لحي اسمو « لابريك » هو الرئة الاقتصادية ديالهم ولكن كاريان كبير بزاف. لا واد حار لا سيدي بوزكري. فيه تنافس غريب فبناء الجوامع.
وفنفس لبلاصة تلقى شي 5 الجوامع والحركة كتوقف بالمعنى الحرفي للكلمة. الشيفور موسى اللي ما بدا حتى لطناش الخدمة خلى الطونوبيل ومشى يصلي.
حتى الوحدة ونص عاد المحلات فتحات والرواج بدا. حدا هاد الحي كاينة الجامعة الكاميرونية. هادوك عندهم « اله ديالهم » بوحدهم اللي هو صامويل ايطو رئيس الجامعة المنتخب مؤخرا. ناس راسمينو فهيئة ملاك جاي من السما باش ينقد بلادهم وشي هاز صورو فهيئة سبع اللي هو هوية منتخب. سبع غير مروض. باش خرج « الاله » ديالهم فرانج ناضت القيامة وكلشي كيغوت. موحالش رئيس جامعة فشي بلاد فالعالم عندو هاد الشعبية اللي عند ايطو.
لعب دور كبير مع الرئيس بيا باش هاد الكان يتنظم فهاد الدولة. شخصية ايطو وحضورو الدولي خلى الفيفا ورئيسها والكاف يخافو ويرجعو اللاور واخا عارفين باللي هاد الدولة ما جاهزاش لتنظيم الكان.
المهم اللي كيجيو كل نهار كي قالو ل »كود » كاميرونيين٬ مقنانعين باللي دولتهم ماشي غير غادية تنظم هاد الدورة مزيان ولكن غادية تربحها.
ما يمكنش تجي لياوندي بلا ما تمشي فين نازل المنتخب. نازل فاوطيل « مون فيبي » على جبل « فيبي ». كان خاص يكون معاه فنفس لوطيل منتخب الكاميرون٬ فاللخر بقى معاه منتخب منافس ليه للي هو منتخب القمر. غادي يلعب معاه فالماتش الثاني. من الاعراف ان المنتخبات اللي فنفس المجموعة كتكون فاوطيلات مختلفة. الكابون مثلا نازل فاوطيل « سطار لاند » ومانازلش معاه منتخب غانا اول خصم للمغرب فهاد المجموعة نهار 10 يناير.
فهاد لوطيل اللي جا فبلاصة مزيانة كاين كليان وكاينة الحركة. ماشي غير للمنتخب. حدا البيسين كان مساعد المدرب حجي هرب من الشامبر باش يضرب كويرو ورجع. تلاقى مع شي وحدين تصورو معاه.
لوطيل للي كتملكو الدولة بحال اي مؤسسة تابعة للدولة.
فلوطيل كتلاقى مع لعابة جزر القمر كيهدرو مع الناس بعد ما سالاو تدريبهم. ضريفين مؤدبين. دياولنا اجلو تدريب كان عندهم اليوم.
