نجوى المالحي-كود//
البارح الاثنين كان العرض ما قبل الأول ديال فيلم “الأخوان” بميگاراما فكازا، أول فيلم سينمائي للكوميدي عبد العالي لمهر المشهور بطاليس والكَروب ديالو لي مجموعين في “humouraji”، وهو أيضا أول إنتاج سينمائي ديال ادريس شحتان، مدير ومؤسس “شوف تي ڤي”.
العرض عرفاتو سينما “ميگاراما” لي كانت مضروبة على الآخر ديالها، وفرصة لبزاف ديال الناس لي تلاقاو في حدث جمع الصحافيين بالسياسيين والمغنيين والكوميديين والمسؤولين في قطاعات كثيرة ومتنوعة.
من بين الضيوف كان المهدي بنسعيد وزير الشباب والثقافة والتواصل، سعيد الناصيري رئيس فريق الوداد ومحمد بودريقة الرئيس السابق للرجاء ورجال اعمال وبرلمانيين وصحافيين وفنانين… ولاليست طويلة.
ادريس شحتان قدر يجمع بزاف دالناس في مجالات مختلفة في نفس القاعة، ويتفرجو في فيلم لي الكتابة ديالو بدات في 2014، والفريق مبغاش يخرجو لأرض الواقع حتى يكون كامل مكمول من جميع الجوانب.
قبل انطلاق عرض الفيلم، عطات المنشطة زينب صابر الكلمة لطاليس وشحتان، وبعدما طلع فريق العمل التقني والممثلين كاملين فوق الخشبة باش ياخدو صورة تذكارية.
وفي نفس الوقت، طلع طاليس وفريقو فوق الخشبة ودارو show وشطحو وغناو مع الأغنية لي داروها خصيصا للفيلم السينمائي.
الفيلم غادي يبدا العرض ديالو ابتداء من غدا الأربعاء، وهاد التاريخ ماشي اعتباطي، اختاروه باش يخرج أيام قليلة على أحداث 16 ماي الارهابية.
