26/04/2024 19:58
حرجو البيضي.. يوسفية برشيد خلصو اللاعبين فالشهور اللي كيتسالو ودايرين تيار تصحيحي فالنادي
نجوى المالحي-كود//
الممثل والمغني فيصل عزيزي هدر على الفرنسية والطبقية وكيفاش المغربي كيشوف واحد مكيهدرش مزيان بيها في بوسط انستكرامي كشف فيه المعاناة ديالو ملي جا من الشمال واستقر في العاصمة الرباط حيت كان غير كيدوي الاسبانية والانجليزية والفرنسية لا.
وجا في بوسط فيصل: “يوم وصلت للرباط عرفت انني غانعيش مرض اجتماعي كبير ولي ما عندناش فشمال المملكة. اذا ما كنتيش تتكلم الفرنسية بطلاقة بعض الناس غايشوفوك حقير و بدون مستوى. اذا ما درتي مجهود و نطقتي الفرنسية غلط العينين غايطلعو و يهبطو فيك. اللي كيدويو الفرنسية “ناس” و اللي ما كيدويوش بها “أشباه البشر”. تحس روحك مدوز امتحان اجتماعي ٢٤ ساعة”.
وأضاف “جيت للرباط وأنا أتكلم الإسبانية والإنجليزية و كان ذلك غير كافي غير باش تعرفوا المرض الاجتماعي شحال مزمن. تعلمت الفرنسية فقط للدفاع عن نفسي. للإشارة شاركت فأنتاجات فرنسية كبيرة كممثل، على الأقل هاد المقاتلة فادتني فمشواري”.
وفي الأخير أكد “من هاد المنشور، ما بغيتش نقول ليكم ما تعلموش الفرنسية، اي لغة مزيانة. و لكن كنت نتمنى نتعلمها بحافز اخر من غير هذا”.
وفي رسالتو الأخيرة للمتتبعين كتب “الا كنتي مغربي، مولود بالمغرب، والديك مغاربة و بديتي كاتسبيكي عليا بالفرنسية غانجاوبك بالدارجة، واخا اليوم كاندوي الفرنسية احسن منك و نصححلك”.
