عفراء علوي محمدي- كود//

مغربية قررات تخرج على المألوف، وتطلب من راجلها الزواج مرة أخرى، الخميس اللي فات فموروكو مول فكازا، يعني قبل عيد الحب بنهار، بطريقة رومانسية وقدام العالم.

السيدة هضرات مع شريكها ففيديو داز فشاشة كبيرة فموروكو مول وعبرات ليه على أحاسيسها، وطلبات منو يجاوبها على سؤال واحد واللي هو “واش تقبل تزوج بيا مرة أخرى؟”، قبل ما تخرج عندو وتحني على ركابيها وتعطيه خاتم الزواج، وتعنقو بالجهد.

وفالوقت اللي قدرو نساء يتحررو من القيود المجتمعية اللي كتخليهم مسلوبات الإرادة، وماقادراتش يعبرو على أحاسيسهم او يختارو شريك حياتهم براسهم بلا ما يتسناو حتى شي واحد غريب يدق فالباب وإلا يموتو عزبات، كاينين نساء حطمو هذ التقليد، وختارو هوما اللي يخطبو رجالهم وماشي العكس، ومن ضمنهم الممثلة ماجدولين الإدريسي اللي أكدات فمناسبات كثيرة بللي هي اللي ختارت رجالها بجوج.