كود كازا ///

وجودهم خطأ. ظهورهم اول مرة خطأ. قلناها من النهار اللول ف”كود”. دخلو فامور ما عندهم لا الصفة لا القدرة الفكرية بحال داك الشي اللي دار فالعيون او اللي داروه فسبيطار بن سينا.

طغاو هاد الزعيترات بزاف. ولاو كيتعداو على مواطني “صاحب الجلالة” وشعبو ويشدوه من ودنيه ويخلعوه بعبارة “ناس سيدنا” وما تحرك حد.

اخر عنترياتهم تهنئة دارها عثمانهم. نشر سطوري على انستاگرام بغى يبارك لمولاي رشيد ميلاد مولاي عبد السلام. ما كيهمش الاخطاء اللغوية. الغريب فهاد الشي من واحد كيقدم راسو “من ناس سيدنا” انهم حيدو صفة “الامير على مولاي رشيد”.

هادو وحدين من المفروض هاد الكلمات عندها قيمة كبيرة. هما عارفين هاد الشي. كيتحركو فطونوبيلات القصر وكيستغلو الملكية فكلشي حتى فالبيع والشرا ديال البورگر وليپات.

طبعا هادي ماشي بريئة من عثمان ابو زعيتر. ما صححهاش. اليوم حيد صفة الامير على مولاي رشيد وغدا اش من صفة غادي يحيد ولمن واش غادي يعطي لراسو من صفة؟ معاهم تسنى كلشي