كود : أحمد الطيب//
تراجع الحسين عموتة مدرب فريق الوداد على القرار ديالو باش احيد بعض اللاعبين من الوداد، وكان دايرهم في لائحة الانتقالات، ولكن من بعد العيد تراجع على هاد القرار، وطلب من ثلاث ديال اللاعبين اجمعو الحقائب ديالهم باش امشيو مع الفرقة للجديدة، وشاركوا في المعسكر التدريبي.
عموتة قرر ارجع رضى الهجهوج لكان تخلى عليه وطلب من المسؤولين اخليوه امشي العب مرة خرى في الإمارات، بعدما لعب الموسم الماضي معارا.
وتراجع عموتة أيضا على إبعاد فيصل الحدادي، وزهير المترجي، بعدما كانوا حتى هما في لائحة الانتقالات ديال الفريق الودادي، ودابا راهم مع الفرقة كيدربوا في الجديدة.
التعاقدات لبانت لعموتة أنها مغاديش تفيد الفريق بزاف، وتواضع مستوى بعض اللاعبين هو لخلى المدرب الودادي ارجع الهجهوجي، والمترجي، والحدادي، باش اقدر العبهم إلى بان ليه أنهم في المستوى المطلوب.
الوداد كيتسناه ماتش صعيب مع الفتح في البطولة الوطنية، قبل ميبدا استعد للمباراة ديال ربع نهائي دوري عصبة الأبطال لغادي اواجه خلالها فرق صان داونز من جنوب إفريقيا.
