كود الرباط///

هاجم حكيم بنشماش الامين العام ديال البام، القناة الثانية “دوزيم”، معتبرا تغطيتها لأشغال اجتماع اللجنة التحضيرية بأكادير لم تحترم المساطر الادارية المعمول بها، وأنها قامت بتغطية حدث لم يكن بمقر الحزب بأكادير.

بنشماش اللي ضرباتو محكمة أكادير حتى نقز، اعتبر أن التغطية خذات غير جهة وحدة وماخذاتش گاع الاراء.

مديرية الاخبار فدوزيم ماسكتاتش ليه، وقالت أن هادشي كولو تخربيق، لأن التغطية كانت لنشاط حزبي تخاذت فيه أراء أعضاء فالمجلس السياسي والمنسق الجهوي وعدة كوادر ديال الحزب، مشيرة أنها فمساء اليوم ذاته دارت   روبورطاج خذات فيه أراء جميع الاطراف، وحتى مقتطف من كلمة بنشماش.

وزادت مديرية الاخبار أنها شحال من مرة كتتاصل بالامين العام باش تاخذ رأيه، ولكنه مكايجاوبش ويلا جاوب كيعطي غير توضيح، وشي مرات كيقوليهم شوفو الناطقة الرسمية، اللي تا هي كتقوليهم شوفو الامين العام.

بنشماش فنهاية رسالته قال أنه كيحتافظ بحقوقه القانونية، بمعنى أنه كيهدد دوزيم بالالتجاء للقضاء، وهادي عادة ماشي غريبة عليه، راه جر سابقا أربعة صحافيين للقضاء لأنهم نشرو أخبارا صحيحة، حقاش هو ماعندوش مشكل مع الأخبار المفبركة.