عفراء علوي محمدي- كود//

ماتعطلاتش الفيمينيست والفنانة التشكيلية خديجة طنانة باش تجاوب الناس اللي سبوها على مواقع التواصل الاجتماعي، بسباب فيديو “المغتصب هو نتا” اللي دارتو دينامية “جسدي حريتي”، واللي وصفوها بسبابو ب”الشارفة”، وعيبو عليها الى اعتبار أن الفيديو حسبهم “مافيهش إبداع وغير تخربيقة”.
طنانة وجهات كلام قاصح لمنتقديها، وقالت ليهم، فتدوينة تعممات ف”السوشل ميديا”، أن هؤلاء اللي شتموها بكلام قدحي ونابي هم فقط “ضحايا يثيرون شفقتها”.

اما الاشخاص اللي ماعجبهم شكل طنانة وعيبو عليه بسبب كبرها فالسن، فقالت ليهم الفنانة التشكيلية: “انا مكانش الهدف ديالي نثير إعجاب الجميع، واللي قال عليا “شارفة” كنقولو بللي هذي هي سنة الحياة، وكلكم غاتوصلو للسن ديالي، لكن السؤال هو: واش غاتكونوا بنفس الخيوية والنشاط ديالي؟”

وختمات طنانة تدوينتها وقالت: “عامل السن عمرو مكان كيشكل لي عائق، وها انا فسن 75 ومازالة فالحيوية والنشاط اللي كانو عندي قبل وأنا، ومكانعتقدش أنني تغيرت”.