نجوى المالحي-كود//

القيل والقال في قضية الرابور “مسلم” والممثلة والمنشطة آمال صقر مازال غادي وكيكبر.

سيمانة من بعد ما نفى الرابور زواجو من امال، خرجات مراتو السابقة في حوار مصور كشفات فيه أنهم مصاحبين ومن هادي سنين.

طليقة الرابور كشفات أن أمال صقر كتجمعها علاقة براجلها من 2015 يعني هادي 4 سنين،  وقالت انها فهاد السنوات كاملة حاولات باش تحافظ على زواجها لكن العلاقة الغرامية لي كان داخل فيها راجلها مع صقر ولي مابغاش يوقف خلاتها تطلب الطلاق.

الزوجة السابقة بانت مكالمية وهي كتكلم على الموضوع، وقالت أنها حاليا ماعارفاش واش تزوجو لكن لي مؤكد أنهم مصاحبين.

والمثير فهادشي كامل، أن السيدة كتدوي على طليقها مسلم، بلاما تلومو وكتدوي على أمال صقر خايب بحالا زعما الخطأ كتحملو غير المرا والراجل لا، داك العقلية البيريمي ديال “هي لي داتلي الراجل، والراجل مسكين مادار والو”.

وقالت الزوجة أن أمال صقر هدداتها وقالت ليها أنها عندها صور وفيديوهات مثيرة ديالها لي غادي تحط في مواقع البورنو الا مشات حتى جبدات الموضوع.

“كود” حاولات تواصل مع الممثلة امال صقر والرابور مسلم لكن حتى واحد فيهم ماجاوب.