كريم الصوفي – كود//
ذكرت مواقع إخبارية فرنسية، أن محكمة مونبليي حكمات، مؤخرا، على مغربي عندو سجل إجرامي ثقيل، بالحبس 3 سنين ونص بسبب تهمة العنف المشدد ف حق رجل من ذوي الاحتياجات الخاصة عندو 38 عام. هاذ الواقعة طرات ف 2 غشت الحالي والضحية ما عندو معاه حتى علاقة، غير عجبو الحال وجه ليه إهانات وشبع فيه كروشيات وتهديد ب جنوية، حسب تصريح لمكتب المدعي العام في مونبلييه.
وحسب ميدي ليبر، المتهم المغربي اللي كيعيش مشرد وأب ل 3 الأطفال، كان سكران ونزل ف محطة ألبير الأول وبسباب أشغال مؤقتة، طلع ليه الدم ومع خرجة جات عينو ف الضحية وبرد فيه غدايدو وهرب من مسرح الواقعة، لكن البوليس قدر يشدوه.
واخا نكر اللي طرا، واجهوه بتسجيلات الكاميرا اللي وثقات كلشي. المتهم عندو 35 سابقة إجرامية وجمع بين العنف المشدد والسرقة بالعنف والتزوير وحيازة السلاح والعصيان. دابا ممنوع عليه حيازة سلاح لمدة عشر سنوات مع أداء تعويض للضحية بقيمة 3000 يورو.
