عفراء علوي محمدي- كود//
المغرب عطى الحق للمغاربة اللي فتونس وليبيا باش يجيبو الناس اللي توفاو ليهم تماك يتدفنو فالمغرب.
وحسب القنصلية العامة دالمغرب فتونس، فهذ العملية الاستثنائية غدي تتم “تبعا لقرار السلطات المغربية الهادف لنقل جثامين المتوفين للدفن بأرض الوطن”، وضروري تكون “فإطار احترام الشروط اللي حدداتها الوزارة”، تفاديا لانتقال عدوى فيروس كورونا المستجد بين الأشخاص.
ومن ضمن هذ الشروط، حسب بلاغ للقنصلية حصلات عليه “كود”، مايكونش المتوفى مات بسبب كورونا، ويدارو ليه وثائق المعمول بها لترحيل الجثامين من طرف مؤسسات دفن ونقل الأموات، وتتكلف شركات التأمين او عائلات المتوفين بمصاريف الترحيل.
وأكدات القنصلية بللي ميمكن تصدر رخصة النقل والدفن فالمغرب إلا بعد إذن وزارة الشؤون الخارجية والتعاون الأفريقي.
