عن تدوينة للباحث عبد اللطيف اگنوش//

ايلى كان صحيح ما قرأته على صفحات TelQuel بللي رفيق بوبكر، الممثل للي ماعمرني شفت ليه شي حاجة وماكانعرفوش، تابعاتو النيابة العامة على “خرق قانون حالة الطوارئ والحجر الصحي”، ثم على “الإساءة للدين الاسلام” المنصوص عليه في قانون مصطفى الرميد في الفصل 267، راه هاذا الفلاس وصافي من وجهة نظري!! علاش؟!

بالنسبة لخرق قانون حالة الطوارئ، الراجل كان في دارو وفي الحجر الصحي، ساد عليه وعلى عائلتو والقراب ليه للي معاه ديما…كايضرب الطاسة؟؟!….ومن بعد؟! ياك في دارو؟؟ وفين هو خرق قانون حالة الطوارئ؟؟!
واش زعما حينت الگلسة دالقصارة ديالو دازت للفايسبوك ؟؟! ومن بعد گاع؟!! واش هو للي صور ونشر القصارة ديالو؟!! وحتى لو نشرها گاع هو براسو؟؟! فاين هو خرق قانون حالة الطوارئ الصحية؟؟! في كل بلدان العالم الان الناس كاتدير “آپيريتيف افتراضي”، وحتا شي دولة ماتابعت هاذ الناس!!!! هاذا سميتو “العضان” ماشي تطبيق القانون!!!!

ندوزو للتهمة ديال “الإساءة للدين الاسلامي”….شخصيا شفت الفيديو المنشور وللي بنات عليه النيابة العامة المتابعة…مافيهش إطلاقا شي بداية الإساءة للدين الإسلامي او الحس ديالها…السيد كايضحك على أئمة الجوامع شاد فيهم، ماشي في الإسلام آ بوعزة…شاد في بنادم ماشي في الدين… وأئمة الجوامع ماشي هوما الدين، وماشي هوما الإسلام…حتى ملك البلاد عطى الامر ديالو في 2011 باش يتشطب على النص القديم ديال الدستور وللي كان كايگول أن “شخص الملك مقدس لا تنتهك حرمته”، مع انه أمير المؤمنين وإمام الأمة، ماشي غير “حتة إمام مسجد “…واش بغيتو نمتعو أئمة المساجد بالقدسية ونجعلوهم في مرتبة الدين الاسلامي؟!! وعليه، لابد مانميزو بين بنادم وبين الدين الاسلامي…

واش حينت گال لعباد الله يتوضاو بالويسكي والفودكا والروج؟؟! ومن بعد؟؟! الشراب كولو ما لقيتش شي تحريم نصي قرآني ديالو گاع…مع ان الله عز وجل يحرم بالنص ما يريد تحريمه، وينهى عما يريد ان ينتهى عنه…مانزيدوش من عندنا أشياء ما حرمهاش مولانا وحرموها الفقهاء للي مجرد بشر يقدرو يصيبو ويقدرو يخطأو….وعليه، الغسيل ولا الوضو بالروج ولا بالويل، ماعندوش أدنى علاقة بالإساءة للإسلام، بحالو بحال كوكا ولا فانتا ولا پيپسي….بركة من العضان عافاكم…بلادنا مامحتاجاش تكون في الموقع المحرج للي بغيتو توصلوها فيه….
أقول قولي هذا، وأستغفر لي ولكم ولجميع المؤمنين وماشي غا المسلمين، والسلام على أشرف المرسلين!!!