محمد سقراط-كود///

هادشي ديال التأثير الفايسبوكي والهجومات على المسؤولين والوزراء ونشر الإشاعات، وقاطعوا منعرف شنو، راه أحسن وحدين فيه هوما لخوانجية هوما الرواد والمسيطرين ولي ماقد عليهم حتى حد، وبلا أسماء مشهورة وشخصيات عندها تأثير، غير جوج أو تلاتة من بنكرير وجوج صفحات وكروب ديال البيع والشرا فاليوسوفية كيقلبو البلاد، ويمرضوا مسؤولين كبار خاسرين الفلوس على البروبكندا وتلميع الصورة ديالهم، ومع ذلك كانو المداويخ كيف سماهم بنكيران غير بربع إشاعة يضربو ليهم كاع داكشي لي خسروا فالزيرو، وسنوات وهوما كيعيثوا فسادا في الويب المغربي ومخلاو ماهاجموا وما خونوا، لم يسلم من أذاهم حتى قياديي حزبهم، وماشي غير جا بنكيران وسماهم مداويخ .

دابا حتى بداو العدالة والتنمية يوصلهم صهد الفايسبوك عاد ولاو الفايسبوكيين غير هدارة وسوقهم خاوي ومكينتجوش الثروة، على أساس المداويخ كانو كينتجوها إلا في حالة وصلاتهم واجدة من برا، الأزمي عاد فاق لهادوك الذين يمتهنون تبخيس السياسة والسياسيين والمنتخبين والمجتمع المدني، على أساس بحال الى دابا عاد ولاو مكانوش شحال هادي ملي كانو كيتهجمو على المنافسين ديالهم، تبخيس مجهودات الدولة وتبخيس السياسة والسياسيين راه كتائب البيجيدي لي جابوه للويب وطبقوه ونشروه وولاو عندهم معتقلين سابقين ديال هادشي في شبيبتهم.

حاليا يبدو أن الدوخة عمت كولشي في الفايسبوك وأصبح إنتقاد المسؤولين والتهجم عليهم والسخرية منهم كيعطي شرعية نضالية ومصداقية، واي تشكيك فهاد الناس هو ضرب ماشي لحرية التعبير وإنما ضرب لفكرة المدون الفاضح الصادق العايق، وكي العادة غادين وكيتقادو منتقدي الحكومة المقدسين وأي تشكيك غير في نزاهتهم يعتابروه إنتهاك لمصداقية المناضل وخاص تنوض حرب المئة عام على ودها، وحتى دابا أصلا شكون لي كيدافع على الأزمي في الفايس من غير المداويخ وكاين لي عتابروه بحال الرسول ملي سبوه الكفار والمشركين، خاص الأزمي تكون عندو الروح الرياضية ويقبل يتلعب معاه بالطرق لي كيلعبو بيها المداويخ سنوات هادي وتاحد ماحبسهم.