رابطة البوليساريو فالصبليون كضغط على وزارة الثقافة باش تحيد الاعتراف بمغربية الصحرا من الجريدة الرسمية ديال إسبانيا
كود الرباط//
علمت “كود” من مصدر مطلع أن السبب الرئيسي علاش توقفات ندوة عزيز اخنوش رئيس حزب التجمع الوطني للاحرار، لبارح الثلاثاء 11 ماي الجاري بالليل ف ندوة مؤسسة الفقيه التطواني، هو “اختراق الكتروني” من مجهول تمكن يوقف اللايف بالتحكم ف “الويفي” ديال المؤسسة.
واش جهة ما (مجهولة) او شخص معين (مجهول) تمكنات من التحكم فالويفي ديال مؤسسة الفقيه التطواني؟ ديك الفترة جاو تقنيين من اتصالات المغرب ووفق مصدر من عندهم ل”كود” قدرو يدخلو ويحلو المشكل. مصدر “كود” قال باللي بدلو كلمة السر وباللي الروتور تساتيرا
البث توقف بعد مرور ساعة و40 دقيقة تقريبا، بسبب الاختراق الالكتروني اللي وقع وااللي مزال ممعروفش الجهة اللي دارتو.
الندوة كملات عبر تقنية 4G بحيث طلقو الويفي من هاتف احد الحاضرين فالندوة.
هاد التوقف جا مباشرة بعد حديث اخنوش على كيفاش كيستعملو خصومو السياسيين مصطلح زواج المال والسلطة باش يضربوه، وقال بلي هاد المصطلح جا من تونس ومصر والاخوان.
لبارح كذلك كان استطلاع على نسبة المشاهدين باين، بحيث أن أخنوش تفوق بفارق كبير في نسبة المشاهدين والمتابعين على باقي زعماء الاحزاب السياسية اللي شاركوا ف ندوات الفقيه التطواني طيلة شهر رمضان.
احصائيات أمس، فيها أن نسبة مشاهدة ندوة اخنوش فاتت 408 الف متابع، لكن غير هاد الصباح طلعات نسبة المشاهدة لأكثر من 500 الف مشاهد.