كود كازا//

الجمعيات الحقوقية و منظمات المجتمع المدني كاعيا بزاف على سانشز.

المرسوم الوزراي اللي خرجاتو الحكومة الإسبانية باش تدبر على اليد العاملة فالقطاع الفلاحي أسثتنى المهاجرين الحاركين فإسبانيا. مجموعة من الجمعيات منها unicef , Save The Children Andalucia Acoge, الجمعية المغربية لإدماج المهاجرين و جمعيات حماية حقوق المهاجرين القصر رسلات رسالة لوزيرة الإدماج و الضمان الإجتماعي و الهجرة تتعاتبها على محتوى المرسوم الوزاري و تتشير لضبابيته.

إضافة إلى إقصاء المهاجرين اللي معندهم وراق من هاد حملة التشغيل فالمزارع الفلاحية، المنظمات الحقوقية أعتبرات النص عامر بالثغرات خصوصا فالشق المتعلق بتشغيل المهاجرين الشباب اللي كانو من قبل قصر تحت حماية الحكومات المحلية.

النشطاء الإجتماعيين و الحقوقين اعتابرو ان النص غامض و متيهظرش على شنو مصير هاد الشباب ملي غادي تسالي حالة الطوارئ و القطاع الفلاحي ميبقا عندو بيهم غارض.

المنظمات عاتبات الحكومة بانها موفراتش حل دائم لهاد الشريحة اللي غادي ترجع لحالتها السباقة اللي هيا اوراق الإقامة و لكن دون الحق فولوج سوق العمل.

بزاف ديال الجمعيات اعتبرات هادشي اللي دارت حكومة الإئتلاف اليساري استغلال لحالة هاد المهاجرين الشباب باش توفر يد عاملة رخيصة و تضمن توفير المنتجات الفلاحية خلال فترة الطوارئ. المنظمات نبهات الحكومة ان هادشي عيب و عار، خصوصا ان هاد اليد العاملة الشابة و اللي غالبيتها من المغاربة غادين يشتاغلو فالحقول بدون ضمانات و مع تعريض نفسهم لخطر الإصابة و فالأخر غادين يشدو فالدص!