كود هناء ابو علي ///
دايرة لائحة اسماء مرشحين للاستوزار هاد ليام. اللي كاين هو ان اللائحة موجودة ودابا خدات طريقها. التعيين ديال الحكومة من المتوقع غادي يكون بعد الاطلاع على اعضاء مجلس المستشارين نهار 5 اكتوبر.
هاد اللائحة فيها اسماء اكيد غاديين نلقاوها فحكومة عزيز اخنوش باش تتعين. رئيس الحكومة كان هدر على شروط للاستوزار وهي الكفاءة والمصداقية والامانة. لكن قبل ما هاد الشروط خاص يكون شرط اهم هو الحالة الصحية للمعني بالامر. ماشي يكون سليم ما فيه حتى مرض. اللا ابدا. غير خاص يكون قادر يدير اجتماعات بعضها كيكون طويل وخاص يكون هادئ ماشي عندو شي مرض مزمن يخليه يفقد اعصابو فلحظات دقيقة من عملو او ياخد القرارات بتسرع.
يعني بالاضافة الي الكفاءة ووو خاصو يكون صحيا قادر علي هاد المسؤولية. وهاد لشي خاصو يكون اهم شرط. اكيد ان اجهزة فالدولة باش كتبحث على العناصر المرشحة للاستوزار كيتفكر فهاد النقطة خاصة فوزارات استراتيجية ولكن خاص الاحزاب تسهل الخدمة على كلشي وما تقدم الا اللي قادر جسديا وطبعا فكريا.
علاش هاد الهدرة حقاش كاينين مرشحين فاللائحة اللي كيدور صحتهم على قد الحال. صعيب عليهم يمارسو مهامهم على رأس الوزارة.