عفراء علوي محمدي- كود//

كشفات وزارة الصحة، فتصريحها النصف الشهري لجائحة “كوفيد 19″، اليوم الثلاثاء، أن هذ الأسبوع اللي فات، من 5 حتى ل11 أكتوبر، تسجل أعلى عدد دالوفيات الأسبوعي بفيروس كورونا، بحيث ماتو 275، بينما فالسيمانة اللي قبلو ماتو 261، واللي قبل منها 239، أما قبل كَاع فعمرنا وصلنا لهذ الرقم من نهار بدا الوباء.

واضافت الوزارة أن المغرب جا فالرتبة 36 عالميا من ناحية عدد الوفيات بالفيروس (بزيادة 3 مراكز عن نصف الشهر الماضي الأخير)، والرتبة 30 عالميا من حيث عدد الإصابات (بزيادة مركز واحد عن نصف الشهر الماضي الأخير) والمركز 31 عالميا من حيث عدد الكشوفات.

بالنسبة لرتبة المغرب إفريقيا، فهو يحتل المركز 3 من حيث عدد الوفيات، 2 من حيث الإصابات وعدد الكشوفات.

بالنسبة للوضعية الوبائية فالمغرب فهذ نصف الشهر، من 29 شتنبر حتى ل12 أكتوبر، فتسجلات خلالو 34654 إصابة و523 وفاة، بينما فالنصف الأخير من شهر شتنبر تسجلات 30904 إصابة و499 وفاة، وفالنصف الأول ديالو تسجلات 25613 إصابة و473 وفاة، مما يدل على أن عدد الوفيات والإصابات غادي فارتفاع مستمر.

وفهذ النصف الأول من شهر أكتوبر، تسجلات أكثر من 50 حالة فكل مئة ألف نسمة فكازا سطات وسوس ماسة والداخلة وادي الذهب، بينما فالشهر الماضي كانت جهة دعة تافيلالت هي اللي مسجلة هذ المعدل، بينما سوس ماسة كان فيها من 20 حتى ل50 مصاب فكل 100 ألف نسمة.

وفهذ النصف الأول من شهر أكتوبر، تطورات نسبة الحالات الإيجابية من عدد الكشوفات إلى 11,5 فالمية، بينما كانت فالنصف الأخير من الشهر الماضي كتتحدد ف9,87 فالمية.

بالنسبة للتطور الاسبوعي للمعدل اليومي للحالات بأقسام الإنعاش والعناية المركزة، فوصلو من 5 حتى ل11 اكتوبر ل441، بزيادة طفيفة على الأسبوع اللي فات واللي وصلو فيه ل439 حالة حرجة.