27/04/2024 01:00
ممثل تركي مشهور شرا مدرسة وريبها.. نتاقم من المعلمين لي كانو كيضربوه ملي كان صغير
كود كازا ///
الاتحاديون مضاربين على قضية تسريح ربابنة من لارام. حنان رحاب ولات مدافعة عليهم. تبنات قضيتهم. كتبات كتجاهم طريقة معالجة هاد القضية وقالت “شابها خرق مهني وعيب في اخلاقيات المهنة”. اييه هي كتباتها. فقضية كبيرة بحال قضية توفيق بوعشرين واللي بصاح تم توظيف كلشي باش يضربوه. ما كانتش كتقول راه شابها خرق مهني وعيب. ما يعاب على رحاب كذلك دفاعها على ملايرية لارام اللي هما ليبيلوط اللي فيهم خداو فهاد المغادرة 700 مليون وما داتهاش فعدد كبير جدا من موظفي الشركة اللي غادرو باش يبقدو الشركة.
المهم الحرب فهاد القضية ماشي هجوم على صحف خدات موقف من هاد القضية فقط بل على مدير مديرية التواصل فالخطوط الملكية المغربية حكيم شالوط. هاد المسؤول كان صحافي وكان مدير ديوان الوزير محمد الكحص فحكومة عبد الرحمان اليوسفي. صحافي خدم مع “ليبراسيون” قبل ما يخدم فمؤسسات اخرى منها “لافي ايكو”. هو بعد على الصحافة هادي مدة طويلة. مشى للجهة لخرى. كيدافع على مصالح الشركة.
المهم صحافية “سابقة” حقاش هي برلمانية دابا وغادية ترجع للجريدة وللمهنة اللي عزيزة عليها: ضد “صحافي سابق” واتحادية ضد اتحادي. شالوط عضو نشيط فالحزب. باقي مع الوردة وحنان قيادية فهاد الحزب
دابا واش لشكر غادي يدخل فهاد القضية ولا غادي يستقبل ليبيلوط كيف دار عبد اللطيف وهبي امين عام “البام” واللي كان ذكي فجوابو.
هاد ليبلوط دارو اخطاء كبيرة فالتواصل وقضيتهم ماشي مقنعة. هما كانو محامين فاشلين ليها.
حنان من حقها تعبر على رايها كيف كيدير ديما. من حقها تدافع على اطر شركات مغربية. دابا هاد الفيلم مازال طويل
