عفراء علوي محمدي- كود//

عرفات “كود” من مصادر مطلعة أن عائلة الطفلة مريم (9 سنوات)، اللي تغتصبات لمدة عام كامل من طرف قريب ليها (47 عام)، تراجعات على تنازلها للمغتصب، وحطات شكاية جديدة بيه.

مريم، اللي كتنحد من دوار توريرت انتلاس، التابع لدائرة فم زكَيد بإقليم طاطا، هي وحدة من الضحايا الكثار اللي تغتصبو وتهدر حقهم، بعدما كان ولد خالة مها كيغتصب فيها باستمرار لمدة عام كامل، وفرغ الكبت ديالو فيها بلا رقيب ولا حسيب، وواخا عائلتها فكرات تتابعو قضائيا، وحطات بيه شكاية ف28 ماي اللي فات، رجعات من بعد تنازلات عليها بعدما رغبهم ورغبوهم الجيران، لكنها تراجعات دابا على هذ التنازل.

وقال عزيز، الأخ ديال مريم، فتصريحو ل”كود”، اللي كان معارض للتنازل من اللول، وحاول يقنع الوالدة ديالو باش يعاودو يديرو شكاية بالجاني من جديد، والبارح الأربعاء سافطوها.

وللإشارة، فقضية مريم تزامنات مع قضية إكرام اللي ثارت جدل كبير هذ الأيام، واللي تعرضات بدورها للاغتصاب فمنطقة فم الحصن بنفس الإقليم (طاطا)، من طرف شخص أربعيني، وكانت تنازلات عائلتها حتى هي على الشكاية اللي حطات ضد هذ الشخص، لكن سرعان ما تراجعات على هذ القرار، وهو دابا متابع فحالة اعتقال.