عفراء علوي محمدي- كود//

اعتبر اتحاد العمل النسائي بللي المعطيات اللي ورداتها دورية رئاسة النيابة العامة حول العنف ضد النساء ما بين 20 مارس حتى ل20 أبريل كتبين صعوبة ولوج النساء المعنفات للعدالة فهذ فترة الحجر الصحي، بحيث كتقول النيابة بللي تسجات 892 شكاية منها 148 تحركات فيها الدعوى العمومية، بينما مراكز الاستماع والنجذة ديال الاتحاد توصل فنفس الفترة ب764 اتصال لأزيد من 1000 حالة عنف.

وكيشوف الاتحاد، فبيان ليه توصلات بيه “كود”، بللي هذ النساء كيلقاو صعوبة فتقديم شكاياتهم فهذ الوضعية الاستثنائية بواسطة الوسائل المقترحة من طرف النيابة العامة، خصوصا وأن 60 فالمية منهم أميات.

وحتى إلى حاولو النساء يديرو شكاية مباشرة دالعنف، خصوصا منهم اللي كيتطردو من المنازل ديالهم بالليل بدون ورقة خروج استثنائي، كايجعو يردوهم رجالهم خوفا من المتابعة، وكينتقمو منهم بعد مرور مدة قصيرة بالضرب حيت توجهو للبوليس، وبزاف منهم كيمشيو للمستعجلات.

وعلى هذ الأسباب، كيطالب الاتحاد رئاسة النيابة العامة باش تسهل تقديم النساء للشكايات عن طريق الأرقام الخضراء وتطبيق واتساب، دون حاجة لبريد إلكتروني حيت أغلبيتهم ماقاريينش، وإحداث خلايا التكفل بالنساء ضحايا العنف والتدخل لإبعاد المعنف دون انتظار حدوث أضرار جسيمة.