عفراء علوي محمدي- كود//

الصبليون استثنات المغرب من الدول اللي غاتحل معاها الحدود، وهذشي بسبب الحالة الوبائية لفيروس كورونا المستجد، رغم ان الاتحاد الاوروبي حطو فالليستة اللي فيها خمسطاش دولة ممكن يحلو معاها الحدود.

وفلاليست اللي خرجات الجريدة الرسمية الصبلويونية، اليوم الجمعة، حطات اسبانيا قائمة الدول اللي غادي تستانف معاهم الرحلات، وهذ الدول هوما نفس الدول ال15 اللي علن الاتحاد الأوروبي على فتح الحدود ديال معاها، باستثناء المغرب والجزائر اللي كتشوف أن الوضعية الوبائية واغلاقهم لحدودهم، حيث تعتبر أن فتح الحدود معهم ماعندو حتى اثر على ارض الواقع، والشينوا اللي تعاملات معاها بالمثل، بحكم أن حتى الشينوا ماحلاتش حدودها مع اسبانيا.

وكان الاتحاد الأوروبي علن، فقرار رسمي ليه، على فتح الحدود مع 14 دولة فهذ المرحلة، لتجنب استفحال فيروس كورونا المستجد مجددا فالدول الأوروبية، وبالتالي وقع الاختيار على الدول اللي مامنتشرش فيها الفيروس بزاف، واللي هي الصين وأستراليا وكندا وكوريا الجنوبية واليابان ونيوزيلندا ورواندا والأوروكَواي والتايلاند وجورجيا وصربيا والجبل الأسود، ثم تونس والجزائر والمغرب.