كود هناء ابو علي////

مديرة المخابرات الاسبانية باص استيبان اعتارفات البارح الخميس 5 ماي 2022 فكونگريسو باللي تم التجسس على انفصاليين كاطالان بلوجيسيال التجسس الاسرائيلي “پيگاسوس” لكنها اكدات باللي هاد التجسس تم فاطار “قانوني” وباذن من المحكمة.
4 سوايع ومديرة المخابرات الصبليونية كتفسر لبرلمانيين فجلسة غير مسبوقة سرية فاللجنة البرلمانية “اسرار رسمية” =اسرار الدولة= ما سمحو حتى لشي نائب يدخل معاه تلفونو. 

هاد البرلمانيون ما عندهمش الحق يكشفو على اش دار فهاد اللجنة ولكن اللي تسرب باللي مديرة المخابرات وراتهم الاذن القضائي بالتجسس على بعض الانفصاليين.

لكن هاد الجلسة ما كالمات والو. رئيس كاطالانيا =جيريناليطاد= بيبي اراگونيس =اليسار الجمهوري= تعرض للتجسس كيف فالوقت اللي كان تلاقى مع رئيس الحكومة بيدرو سانشيث وتم التجسس عليه قبل من هاد التاريخ. حزب هاد الرئيس كيدعم حكومة الاشتراكي. هاد الصباح الجمعة 6 ماي 2022 ببرشلونة تلاقاو بجوج. حسب وسائل الاعلام المحلية فاراكونيس طلب من سانشيث يهدر على الموضوع ويوضحو. 

حسب ما تحدثت عنه صحف اسبانية فهاد القرار بالتجسس عبر قرار قضائي كيهم 10 اشخاص. وكانت نيويورك هدرات على ان هاد التجسس كيشمل اكثر من 60 شخص

هاد الشي جا ايام بعد اعلان الحكومة الاسبانية عن اختراق تلفون رئيس الحكومة الاسبانية ووزيرة الدفاع والوزيرة السابقة للخارجية بنفس البرنامج