كود الرباط//
يبدو أن المشاكل والانقسامات بدات كتتسرب داخل فريق الباطرونا في مجلس المستشارين.
عضو الفريق نايلة التازي كتبات رسالة لرئيس الفريق، عبد الإله حفظي، فضحات فيها بعض القرارات والتصرفات اللي وصفاتها بالممارسات غير الائقة.
قالت التازي فرسالتها ان رئيس الفريق دار اجتماع علمهم بيه غير ساعة قبل وفقط بايمايل، من اجل تعيين ممثل جديد لفريق الباطرونا في مجلس المستشارين، واضافت ان هاد الطرق بعيدة كل البعد على الشفافية و الانضباط والاستقامة اللي مطلوبين من رئيس.
واكدت نايلة التازي انها تشوكات فاش قرات عنوان الاجتماع، بحيث فيونيوز تم الحسم فشكون غادي يمثل الفريق، وان الميسيون ديال التازي سيتم تجديدها، وهكاك حضرات للاجتماع وطلبات خلالو ان يتم تأجيلو باش يعاودو يتجمعو في ضروف عادلة واكثر شفافية، وتم رفض طلبها، مضيفتا: “تما فهمت ان القضية فيها إن، و سبق الإصرار والترصد فتصرفات الرئيس”.
وختمات عضو الفريق رسالتها بالقول انها غادي تطعن فهاد القرار/الوضع، وزادت: “كيف قال الملك محمد السادس فالخطاب ديالو، المغرب امام عدة رهانات وتحديات وباش نقدرو نواجهوها، المواقيف الانتظارية والحسابات الضيقة غير مسموحة”.
وكانت الباطرونا دارت حميد الصويري فبلاصة نايلة التازي وخرج احد المقربين من رئيس الباطرونا الجديد صلاح الدين مزوار واسمه زكريا فهيم باش يقول باللي نايلة اللي بغات تبعد ديها فمصالحها ومسائلها وهو ما كذبته نايلة واستغربت هاد التصريح من واحد ما كتعرفوش كاع
