كريم الشركي – كود///

من بعد الشد والجذب اللي وقع بين المغرب والصبليون بخصوص مشكلة المغاربة العالقين فسبتة ومليلية، بداو الصبلبون كيعتارفو أنهم نفخو فأرقام العالقين.

الناطق ديال حكومة سبتة المحتلة كارلوس رونتومي، قال فتصريحات صحفية، أن المغرب خاصو يهز ولادو اللي حاصلين عندنا، سواء اللي بوراقهم أو لي ماعندهم وراق.

هادشي لي قالو رونتومي هو اللي رفضوا المغرب، لأن العالقين بالنسبة للمغرب هوما المغاربة اللي عندهوم تأشيرة وكانوا راجعين وحصلوا، ماشي لس خرج من البلاد باش يقلب على طرف دالخبز وماباغيش يرجع.

رونتومي تحجج بالوضعية اللي كيعيشو فيها هاد المغاربة، ووصفها بأنها غير انسانية، حقاش المراكز الرياضية لي داروها الصبليون كمراز استقبال مؤقتة لا تستجيب للمعايير هادشي علاش المغرب خاصو يهز ولادو كاملين حسب الناطق الرسمي.