عفراء علوي محمدي- كود//
قوانين خوانجية جديدة مفروضة على المرتفقين فالملحقة الإدارية الخامسة بمدينة تمارة، ممنوع لباس الشورط فالإدارة، كيف ممنوع الاختلاط بين الرجال والنساء، حيت كلها عندو مكتب خاص ديال الليكَليزاسيون.
الناشط الحقوقي نبيل بحار، قال فهذ الصدد، فتصريح مقتضب ل”كود”، أن هذ الملحقة كيسيرها نائب رئيس الجماعة المنتمي لحزب العدالة والتنمية، وهذشي اللي كيفسر فرض بحال هذشي داخلها، واللي عتبرها أمور رجعية كتخلي المجتمع يرجع للوراء، وكتكرس منطق إقحام الدين فالشؤون الإدارية للأفراد، وتقنين حرياتهم واختياراتهم باستعمال الدين.
الناشط الحقوقي فضح هذشي على صفحتو فموقع التواصل الاجتماعي فيسبوك، وحط صورة ديال لافتة فباب الملحقة الإدارية مكتوب فيها “المرجو دخول الإدارة بملابس محترمة ومحتشمة”، مرفوقة بصورة ديال منع “الشورت”.
صورة خرى دارها الناشط الحقوقي كتبين تقسيم جناح تصحيح الإمضاء بين جوج: واحد ديال العيالات وواحد ديال الرجال، فتمييز واضح بين الناس على أساس الجنس.
وللإشارة، ماشي بزاف هذي باش مجلس جماعة تمارة، المنتمي ل”البيجيدي”، بدل أسماء أزقة مدينة تمارة بأسماء شيوخ سواعدة سلفيين، تم الاعتمادها بشكل رسمي بلا ما تشاورو مع الساكنة اللي خرجات كتحتج على مواقع التواصل الاجتماعي على هذ “المهزلة”، كيف تم وصفها.
والسلطات المحلية استجبات لاحتجاج الناس على مواقع التواصل الاجتماعي، وجرات تحيط كَاع البلاكات اللي كتحمل هذ الأسماء، فانتظار تعويضها بأسماء جديدة غتتقرر من بعد.
