محمد سقراط – كود//

ماشي أي واحد هاجر لأوربا راه بالضرورة كان بطالي هنا، راه بنادم مكيهاجرش على ود الخدمة فقط بل على ود الحياة فأوروبا بصفة عامة، كانو شحال هادي مهاجرين من البوادي كيمشيو ديريكت باش يخدمو فالفلاحة يجمعو الريالات ويجيو يزهاو هنا، هادو مابقاوش بزاف، دابا فئة كبيرة من الشباب بغات تعيش الحياة ماشي تحوفر، وشحال من واحد خدام هنا سمح فخدمتو وهاجر برا على الأقل غير على ود الوراق، وغير باش يحس براسو بنادم.

الموشكيل ديال الشباب المغربي ماشي هو البطالة بالخصوص، وإنما موشكيلتهم أن الخدمة فالمغرب مكتعيشكش إنسان ديال هاد القرن، بزاف ديال الخدامي راه تقربيا بحال خدام بحال ماخدامش، شوف غير السميك شحال فالمغرب وسول أي شاب او شابة واش يقدرو  يعيشو بهاد القدر عيشة محترمة بلا مايبانو شي نهار فشي فيديو ديال شي موقع كيطلبو سيدنا يجي يشوف من حالتهم؟ طبعا الإجابة غادي تكون بمستحيل، الحياة فالمغرب ولات غالية بزاف غالية على شنو كتستحق هاد البلاد، نظرا للخدمات الإجتماعية لي فيها وجودة الحياة، راه الحياة ولات صعيبة هنا على لي خدام ولي مخدامش على القاري والأمي على الإطار الكبير وعلى طالب معاشو، كولشي تقهر كولشي كيتشكى .

إييه غادي تكون فرص عمل مستقبلا وكاين مشاريع كبيرة راها فالطريق، ولكن واش هاد الخدامي يقدرو يعيشو الواحد بكرامة فالمغرب وماخايفش من المستقبل، راه كاع الطبقة الوسطى وهبط لتحتو لات خايفة من المستقبل وماتايقاش فيه، وماتايقينش فالدولة وخدماتها،  المغرب فيه الخدامي لي كانو كيعيشوا الواحد فالتمانينات ماشي دابا، أما حاليا راه الإحتياجات ديال الفرد تزادت والدولة كل عام كتهز يديها على رعايتو وفالمقابل كتحلبو فالضرائب، وبغاتو مايهاجرش فقوارب الموت أو فأي وسيلة خرى، طبعا يهاجر آش غادي يبقى يدير هنا، يقرى حتى يطيب باش يخدم فشي سوبر مارشي ولا سونطر دابيل إلى لقاها فظروف ديال العبودية والتكرفيص بلا بديل محروم من عدة حقوق عريان فمواجهة مول شي، واش هادي هي الخدمة لي تخليك هنا طبعا لا.