سهام البارودي – كود//
المشكل فقطاع الصحة فالمغرب هوا مشكل امكانيات و عقليات ! و سطر على هادو بجوج ! امكانيات حيت خلاوها جيرانا “ماكاش دراهم” ! ماكاينش اسرة ! ماكاينش تجهيزات ! ماكاينش عدد كافي د الاطر الطبية من ليفام دميناج الفرامليا تال الماجور تال الطبيب ! و هذا مشكل كبير حيت منين مابغيتي تشد قطاع الصحة باش تفهمو غاتلقا واحد السؤال مهم خاصك طرحو ” فيناهوما فلوس هادشي ؟ باش بغيتي نديرو ليك هادشي ؟” ! بغينا اسرة كافية ! باااش؟! بغينا اطباء كثار ؟ بااش ؟! بغينا سبيطار نقي ؟ باش ؟ باش باش ؟! الماطريال كايتشرى بالفلوس و الاطر راه قرايتها و و ليفورماسيو ديالها و صاليراتها خاصهم الفلوس ! حيت راه ديك بغينا و نطالب و يجب و خاص راه ساهلة بالفم و لكن لاجلسنا فوق الطبلة غايخصنا نهضرو بالارقام ! بالدرهم ! وهنا غانضطر نقول بلي” خاص” الدولة دير اختيارو تجبد الدرهم لهاد القطاع و لا كان الاختيار بين هاد القطاع و قطاعات اخرى تسبق هاد القطاع حيت مواطن مريض راه ماغايقرا ماغايخدم ماغاينتج تا قيمة مضافة فالاقتصاد الوطني ! ماغانوريش انا للدولة المغربية منين تقدر تجيب الفلوس لي غاضخهم فهاد القطاع ! و لكن اكيد كاين منين و ديما غايكون منين خاص غي الارادة السياسية باش يتصلح هاد القطاع.
و ثانيا مشكل عقليات ! طبعا كاينين اطر صحية اطباء و ممرضين و قابلات ولاد الناس ! ناس نظاف ! عندهم ضمير مهني ! كايخدمو و كايضربو تامارا مع عباد الله و كايتقاتلو فظروف كارثية وسط مجتمع مازال فيه بزاف د الناس كايآمنو بالخرافة و الشعوذة و يقدرو يخليو الطبيب و يهربو لعند راقي و لا فقيه و لا شوافة ! كاينين اطر صحية ابطال من ابناء و بنات هاد الوطن لي يستاحقوا كل الاحترام! و كاينين اطر صحية لي ماعندهمش ضمير مهني و نهار دارو الطب داروه باش يصورو الدراقش و صافي ! كاتكون جالس عندو فالكابيني ! كايگوليك باش كاتحس ؟ كاتبدا تعاود ليه و هوا ساهي كايشوف فيك ! ماكايسمعكش آش كاتگول لا ! كايكون ساهي كايشوف شحال غايخرج منك من جليجة فالفيلا لي كايبني فطريق ازمور ! شحال من بلاكار ديال الكوزينة يقدر يجبد منك للدار ديال الواليدية ! شحال من طريطة ديال الطوموبيل د المادام غاتخلص عليه نتا …. داكشي علاش كاتسالي الهضرة كاتلقا الدياگنوستيك ديالك واجد ” هادشي خطير عندك آ سي الهروي ! خاصنا ضروري نديرو العملية” باش يحلب منك الماكسيموم ديال الفلوس و هاد النوع طبعا مايمكنش تتسنا منو يأدي الواجب و يوقف راجل فهاد الوضعية الحرجة لي كادوز منها البلاد !
و طبعا كاينة الخوصصة ! لي مزيانة و مطلوبة باش تكمل القطاع و تطورو و تساهم باش تزيدو القدام و لكن خاصها مراقبة صارمة ! راه حنا دولة مقودة عليها اقتصاديا ! مايمكنش يكون الاساس ديال الحياة د المواطن مليوح للقطاع الخاص خصوصا فقطاع حساس فحال هذا ! القطاع الخاص لي بزاف د الكلينيكات فيه متحكمين فيهم لوبيات ديال الاطباء كايتخلصو بالنوار !
الفيديو ديال المريضة فالسطات جا باش يفكرنا بلي قطاع الصحة عندنا قطاع كايعاني من بزاف د المشاكل و بلي هاد الوباء غايكون صعيب علينا نقوموه وسط هاد المشاكل داكشي علاش خاص گاع الجهود تتوجه اليوم لمساعدة هاد القطاع ! ماديا نوفرو الگرمومة و علاش لا فحال ففرانسا حتى من الاطباء و الممرضين المتقاعدين و لي فالقطاع الخاص يعاونو فهاد الازمة ! و طبعا على قد المساعدة على قد المراقبة و المحاسبة لي ضروريين باش ماتوقعش شي كارثة و نشوفو وفيات ماشي بسباب كورونا بل بسباب الاهمال و غياب المسؤولية.
