“كود” تلاقات البگرة اللي ربحات لقب اكبر حلابة. كتعطي 60 ايطرو فالنهار واللي جات الثانية. بجوج ما عندهم سمية وحدة رودانية ولخرى حمداوية
كود سبور//
بدات الشكوك كتدخل مع جمهور الوداد الرياضي بسبب عدم قيام الفريق بانتدابات قوية فالميركاتو ديال الصيفي وكتفاء الرئيس ديال الفريق سعيد الناصيري بالتوقيع مع لاعبين صاعدين أو مغمورين ديال الهواة، هادشي كامل كينضاف لعدم تعيين بديل ديال المدرب وليد الركراكي لي قرر الرحيل.
وتفاعلات الجماهير ديال الوداد على المواقع التواصل الاجتماعي بسبب غياب صفقات ديال لاعبين عندهم أسماء كبيرة فالميركاتو على الفريق الأحمر، بحيث ما خفاتش قلقها على الفريق والقدرة ديالو على الفوز بالألقاب العام الجاي أو على الأقل يحافظ على البطولة والعصبة ليتوج بهم الموسم الماضي، لمغادرة الركائز ديال الفريق كمبينزا وأشرف داري والشكوك فبقاء القائد يحيى جبران ليعندو عروض مهمة وأبرزها من الزمالك المصري، وبالمقابل اكتفاء سعيد الناصيري بالتعاقد مع اللاعب الشاب إسماعيل المترجي من شباب المحمدية ولي هو فالأصل من ولاد الوداد والتوقيع مع لاعبين من الهواة كالمهدي اصحابي وإلياس الزاهر.
ومن الوداديين الناشطين على مواقع التواصل الاجتماعي وليعبرو على غضبهم من سعيد الناصيري رئيس الوداد وطريقة تدبيرو للمرحلة ديال الميركاتو، المنخرط الودادي عبد الواحد الواصي لي ملقب عند الوداديين بشيشا، ولي دخل طول وعرض فالنصيري ونشر تدوينة على فيسبوك قال فيه: “وا الرئيس وا سعيد الناصيري راه قلنا ليك طعم الفريق ماشي خرب الفريق”.
وضاف المنخرط الودادي: “جبتي حارس احتياطي فالفريق ديالو فالهواة عيب كاع متيلعب حتى فالهواة و زدتي كملتيها بلاعبين آخرين، واش هادي انتدابات نلعبوا بها على البطولة و العصبة ولا شيء آخر؟ إلى غتجيب 3 لعابة مزيانين و تزيد حداهم 11 كروسة غير بلاش”.
وختم الواصي التدوينة ديالو ملي قال: “تخيلوا هاد الكرارس جابهم واحد الوكيل مسمي على راسو ودادي و الصفحات ساكتين حيت مرة مرة تيعطيهوم خبيرات، هادشي بسال واقيلا نبداو نحطو كل واحد بالسمية ديالو”.
الجماهير الودادية ولات كتحط يديها على قلبها كل ما قرب شي ميركاتو، خصوصا أن الانتدابات ما كانتش فالانتقالات الشتوية الماضية، مع العلم أن الفريق عندو مشاكل كثيرة فالنزاعات مع لاعبين ومدربين سابقين، وخاصو يلقى ليها حلول قبل انطلاق الموسم هو الأمر ليكيخلي سعيد الناصيري أمام تحديات كثيرة ومن بينها تدعيم الفريق بمدرب جيد ولاعبين قادرين على منح الاضافة للفريق.