عفراء علوي محمدي- كود//

اعتبرات سميرة سيطايل، المكلفة بمهمة فالسفارة المغربية فباريس، ومديرة الأخبار سابقا على القناة الثانية، أن القضاة كثرو، وعطاو احكام قاسية للصحافيين عمر الراضي وسليمان الريسوني وعماد استيتو.

وبهاشطاكَات “بزاف”، و”فري كلشي”، و”باراكا”، قالت سيطايل أن 6 سنين ديال الحبس للراضي، و5 سنين ديال الحبس للريسوني، وعام للي تعطى لاستيتو، كثيرة بزاف، “غير بالعقل ا القضاة المحترمين، واش ماكتشوفوش انكم زدتو فيه شوية بهذ الأحكام؟”، كتساءل سيطايل فتويت ليها.

وزادت، فسؤال استنكاري: “او هذي طريقتكم باش تباركو لينا العيد الكبير”؟

وتعطات للصحافي الراضي 6 سنين ديال الحبس بتهم التخابر مع أجانب والتجسس والاغتصاب، مع تعويض 20 مليون، بينما تعطات لعماد استيتو تهم عدم التبليغ بوقوع جناية او تقديم مساعدة شخص فخطر، وتعطات ليه عام ديال الحبس وتعويض 2 مليون، بينما تحكم على الريسوني ب5 سنين بتهم هتك العرض والاحتجاز، ويخلص تعويض ديال 10 مليون.