عفراء علوي محمدي- كود//
علنات وزارة الصحة على تسجيل 68 إصابة جديدة بفيروس كورونا المستجد فهذ 24 ساعة الأخيرة، أي من الستة دلعشية لبارح الخميس حتى للستة دالعشية اليوم الجمعة، وهكذا وصل عدد المصابين فالمجموع لـ8071، أي بنسبة 22,2 لكل 100 ألف نسمة.
وقال معاذ المرابط، منسق قسم الطوارئ الصحية فوزارة الصحة، فالندوة اليومية للترصد الوبائي لفيروس كورونا المستجد، أنه تسجلات 73 حالة شفاء اليوم، ووصل المجموع لـ7268 حالة، ونسبة تعافي وصلات لـ90,1 فالمية.
وما تسجلات حتى وفاة اليوم، واستقر المجموع ف208 ، أي بنسبة إماتة استقرات ف2,6 فالمية.
والحالات النشيطة بلغ عددها 595 حالة فقط، أغلبها كاينين فجهة كازا سطات (275).
وتم استبعاد 14271 حالة، ووصل عدد الحالات المستبعدة فالمجموع لـ267278 بعد ما خرجات تحاليلهم نيگاتيف.
وفهذ 24 ساعة، جهة مراكش هي اللي سجلات أكبر عدد ديال الإصابات (31)، منها 27 حالة كتتعلق ببؤر صغيرة عائلية مرتبطة بالبؤرة الكبيرة اللي تسجلات لبارح، من بينهم 11 طفل من مجموع 41 طفل فهذ البؤر ككل، وكلهم بصحة جيدة.
بالنسبة للجهات الأخرى، كازا سجلات 18 الحالة ، طنجة تطوان 8، الجهة الشرقية 6، جهة الرباط سلا 5، بينما باقي الجهات ما سجلات حتى اصابة.
ومن هذ 68 حالة اللي تسجلو اليوم، تم اكتشاف 62 عن طريق عملية تتبع المخالطين، ووصل عدد المخالطين اللي مازالين قيد التتبع لـ7176.
بالنسبة للحالات اللي كتواجد فالإنعاش، فحسب المسؤول انخفضات لـ18 لحالة فقط، و5 منهم تحت التنفس الاصطناعي.
وهذا التوزيع الجغرافي للإصابات بالنسبة المئوية: