كود كازا ///

هادي يومين استاقل من نقابة ليبيلوط د”لارام” 3 جداد. يتعلق الامل بكل من بوشعيب فكري وخالد الصفريوي والكرنيغي يوسف. قبل هادو كان استاقل الرئيس السابق لنفس الجمعية نجيب الابراهيمي وكديرة عطا.

هاد الجمعية فمكتبها المسير 9 اعضاء. 5 مشاو ما بقات جمعية وزايد على هاد الشي رئيسها الفلاكي هشام عطاوه شي 390 مليون سنتيم فهاد الطرد لاسباب اقتصادية اللي اتخذتها الخطوط الملكية المغربية بسباب تبعات هاد الجايحة.

وكانت الشركة تقدمات بشكاية باش تحل هاد الجمعية اللي سبق وخلعات كاع مدراء “لارام”. كلشي كان كيخاف منها.

فنهار 9 شتنبر تقدمات محامية الشركة ب”مقال من اجل التصريح ببطلان الجمعية والحكم بحلها”٬ فيه الاذن بتنفيذ اغلاق الجمعية المغربية للطيارين المدنيين باللجوء الى القوة العمومية عند الاقتضاء لتنفيذ ذلك الاغلاق” و”منع كل اجتماع لهذه الجمعية” باللجوء الى القوة العامة عند الاقتضاء و”الحكم ايضا بايداع اية اموال نقدية يعثر عليها في حساباتها البنكية اينما وجدت بالخزينة العامة للدولة المغربية اعتبارها اموالها مصادرة لفائدة الدولة”

دابا القضاء نشوفو اش غادي يدير

دابا هاد الجمعية اللي كانت كتخلع دارت اخطاء كبيرة فالتواصل. كيفاش ملايرية ساهمو ب200 مليون فصندوق التضامن ضد “كورونا” يعني كل واحد عطى 3 الاف درهم. اما ديك الكذبة ديال نقصو لينا 30 بالمائة راه كاع موظفي الشركة نقصوها ليهم وراه الشركة دارت معاهم ايلى الامور رجعات مزيان غاديين يسترجعوها كلها

المرحلة الاولى طيرو 65 بيلوط منهم رئيس الجمعية وفمرحلة مقبلة غاديين يطيرو نفس العدد تقريبا ويبقاو مرحلة مرحلة حتى يوصلو ل180 بيلوط من اصل شي 600