كود الرباط//
الفضيحة لي واقعا فنواحي تمارة طريق تامسنا، ديال تزيين طرقان والصباغة وتركيب الانارة والخدمة ليل ونهار باش تقاد دنيا، غير حيث سيدنا غايجي يدشن مشروع فالمنطقة. هاد الفضيحة لي مسؤول عليها أولا هوما هاد المنتخبين العاجزين والفاشلين حتى فجلب الانارة. الضو مكاينش فالطريق بالليل، طريق قريبة من الوطنية وقريبة من سكة تران وقريبة من الهرهورة لي فيها الفيلات ديال شي مسؤولين محظوظين طبعا بأراضي رخيصة فوقتها.
لي واقع فهاد المنطقة كيبين بلي شي مسؤولين كيتعاملو مع المغاربة باستغباء، كيخليهم تا كتقرب زيارة ملكية عاد كيقادو كولشي.
عين عتيق وبعض المناطق المجاورة ليها كتفتقد لشروط العيش الكريم البيسطة، لا تنقل مقاد ولا نظافة اللي مسوؤل عليها طبعا شركة ضربات فلوس صحيحة فالتدبير المفوض لي هي شركة اوزون ديال البدراوي.
لا طرقان مقادة ولا انارة ولا نظافة، هادشي هوما ابسط الحوايج لي ممكن رئيس جماعة يديريهم. زيارة الملك المرتقبة فرشاتهم وخاص تكون مناسبة باش يتحاسبو.
بداو اشارات زوينين باش يوضعو المفسدين اللي كيترأسو الجماعات الترابية لسنوات طويلة، بلا فايدة، كيراكمو الثروات والواقع ديال الشعب مكيتدبلش. هاد الاشارات بانت مع اعتقال محمد مبدع رئيس جماعة الفقيه بنصالح، وعزل ياسين الراضي على رأس جماعة سيدي سليمان وغيرها.
هاد نوع من المسؤولين خصهم يتحاسبو، هاد النوع لي بغا يدير ثروة بالصفقات والتخلويض بلاصتو الحبس. راه أقل شيء ممكن يديرو هو يقادو غير الطرقان والانارة. بلاصت مايبقاو يتغاوتو فالدورات ديال المجالس على والو حيث شي وحدين مستفدوش من المازوط ولا شي وحدين باغين سيارات الجماعة ولا شي صفقة لصاحبهم او شريكهم. شوهة وصافي.