كود هناء ابو علي ////

امنة ماء العينين برلمانية العدالة والتنمية ووحدة من القافزات فهاد الحزب. جريئة. كتخدم ملفاتها. عندها عطش تعرف وتتعلم. بين البرلمانيين والبرلمانيات المزيانين فهاد الدورة التشريعية. لكن حتى زين ما خطاتو لولة. قضية نشر صورها ف”مولان روج” وفبلاص فاندوم بباريس بلا درة نوضاتها. اثرات عليها. تدبيرها كان كارثي ولعب دور فارباكها واتخاذها قرارات ماشي مزيانة. عدم اعترافها النهار الاول بللي الصور حقيقية خلاها تخرج من مشكلة لمشكلة. الحزب ساندها فالاول من خلال بيان فريق الحزب فمجلس النواب. من بعد بيان الامانة العامة خدا مسافة. طبيعي حقاش رئيس الفريق هو ادريس الازمي المحسوب علي بنكيران اللي قريبة منو ماء العينين والامانة العامة فيها غير اللي ما عندهمش مع ماء العينين حقاش شحال من مرة انتقادات طرق تدبيرهم لملفات.

علاش قلنا امينة ماء العينين ضحية. حقاش بالفعل ضحية كامرأة فمجتمع ذكوري. انضمت لحزب محافظ لا يحترم المرأة واخا يظلو يديرو الشعارات اللي بغاو. حقاش مستمدين هاد الافكار من التراث الفقهي. هما كيقولو حزب من مرجعية اسلامية. جميع الاحزاب اللي عندهم مرجعية دينية عندهم هاد النظرة للمرأة.

من بعد آمنات بحالها بحال عدد من المغربيات باللي “حجابي عفتي” نسات ونساو مغربيات كثار فاللي العفة فنفسها فعلاقتها براسها وهاديك الساعة دخل معتقداتها ولا ما دخلتهمش. العفة فاحترامها لنفسها قبل ما يحترمها الاخر. العفة ماشي لبس ماشي مظهر ماشي تدين…..هاد الشعار كان طلقاتو التنظيمات الموازية للحزب من حركة وشبيبة. ضحكو على مغربيات بهاد الشعار باش الرجالة يبقاو متحكمين فيه وصافي. امنة اكتشفات بحال عدد من المسلمات المؤمنات باللي المظاهر ولا الشكل الخارجي ما عندو علاقة بقوة الايمان =كيفما كان هاد الايمان= وحقاش جاية من حزب رفع شعار “حجابي عفتي” خلصات الثمن غالي ومازال تخلصو. دابا كلشي عينو فيها. داخل الحزب وخارجه. الصحاب فالحزب والخصوم خارجو.

أمنة كذلك ضحية زواج مغربي مبني على كثير من النقاش. خاص لمرا تصبر على مؤسسة وخاصها هي اللي تخلص الثمن. ضحية اختيارات ماشي كتكون شخصية وحتى لا كانت كتدخل العائلة وكتولي لاعب اساسي فهاد المؤسسة. طبعا مع لولاد فدولة متخلفة =فعقلها= بحال المغرب الامور كتزاد تعقدا. لا زدتو لهاد الشي انتماءها للزواية المعينية =ماء العينين= فمدينة بحال تيزنيت. نخليكم تتصورو الامور.

امنة ماء العينين ضحية لنجاحها. تربصو بيها كثار. عدد منهم باغي يدمرها. شي استعمل القلب وشي استعمل معارك سياسية فكرية. ضحية هاداك اللي معاه دابا. خدا مسافة ما دافعش عليها وهو يقول ولد المدرسة الاتحادية. ما دار حتى شي معركة عليها. بقى كيفرج فيها وهي كتصلب وتضرب فالفضاء العام.

ضحية حقاش بضاض يرشي ويعمي العين ويدوخ. الحب والعشق كيتقاطع مع القتل عند عدد من الشعراء. القتل الرمزي كنهدرو ماشي شي حاجة اخرى اي تموت سياسيا. هي اللي خاصها تاخد القرار

قضية الصور كتطرح اسئلة كثيرة. فالصور امنة كتضحك بحال شي طفلة. سعيدة. ناشطة. هاد الصور ما يكون خداهم الا من منحته ماء العينين ثقتها. وما كيكون سربهم او عطاهم او تشفرو ليه =بشي طريقة= الا اللي خدا هاد الصور. الدولة فهاد القضية او بعض اجهزتها ما كنظنش عندهم شي علاقة بالحصول علي الصور. ايلى ماء العينين ما بغاتش تفيق من الگلبة غادية تغرق اكثر.

ممكن ما يكونوش غير صور. ممكن يكونو فيديوهات. يكونو امور اخرى.