كود كازا ////

خبار مفرع كتبو هاد الصباح الصحافي انيس حجام. نشر باللي نسيبو وصاحبو الصحافي جمال بوسحابة٬ 56 سنة٬ =1965. 2021= مات. اختو نادية زادت باللي مات بكورونا. مات بعد صراع مع المرض. مرض قبل بالسرطان. فحياتو اللي دوز فيها مدة طويلة فحي گوتيي فكازا خاض معارك كثيرة. دافع على حييو مقارنة باحياء اخرى خاصة الحي المحمدي. كان كيقلب على بلاصة ليه فالحياة الثقافية والاجتماعية فمدينة غول بحال كازا.

بوسحابة بدا حياتو المهنية بالفنون التشكيلية. قراها وفالتسعينات دار اول مجلة شهرية مخصصة للتشكيل والديكور والموضة. كان ديما كيقلب على الجمال. سماها “ليزالينيي”.

لكن الصحافة غراتو بحال حياة كازا المتنوعة. بدا تجاربو المهنية فتيلي بلوس كرئيس تحرير ثم مشى ل”لاڤي ايكو” مكلف بقسمها الثقافي. مشى ل”لوجورنال” فعصرها الذهبي. كان مسؤول صفحاتها الثقافية. خدم ف”دوزيم” كرونيكور ف”ليزار اي ليتر”. دار تجربة فالراديو فميدان كيعشقو اي الثقافة. دار كتوبا على الفن.

اخر ما كتب كان الشعر. دار ديوان شعري.

حياتو كلها كانت دفاع على الجمال بالكلمة. دافع على الحريات باستماتة خاصة الحريات الفردية. كانت عندو الشجاعة مقارنة بصحافيين اخرين. كان منساجم مع راسو. المغرب فقد صحافي قافز بزاف.