كود – وكالات //

أعلنات جريدة “نيويورك تايمز” الأمريكية، الأربعاء، أنها فاتت رقم 8 ملايين مشترك فـ النسخ ديالها بجوج، الإلكترونية والورقية.

وكشفات على الأمل ديالها يطلع العدد لأكثر من 8,5 ملايين مشترك من هنا للخر ديال هاد العام.

وفـ2020، تزاد عدد المشتركين فيها بجوج ملاين، بحكم أن هذ العام كان كلو تطورات و أحداث، من بداية جائحة كورونا وعاد حملة الإنتخابات الرئاسية الأميركية بين دونالد ترامب وجو بايدن، وغيرها.

وبعد 10 سنين من إطلاق عرضها الرقمي المدفوع، ولات المنتجات الإلكترونية كاتسيطر على 89 فالمية من إجمالي مشتركي “نيويورك تايمز”.

وتوزعات الاشتراكات الرقمية الجديدة المسجلة فالربع الثاني بين الموقع الإخباري بـ77 ألف اشتراك جديد، وليزابليكاسيون ديال الطبخ والألعاب والمنتجات الصوتية بـ65 ألف اشتراك.

وعلى الصعيد المالي، وصلات المجموعة لربح ديال 54 مليون دولار، وتزادت مبيعاتها بنسبة 23 فالمية، باش توصل لـ498 مليون دولار.

وارتفعت إيرادات الاشتراكات بنسبة 16 فالمية لـ339 مليون دولار، وطلع الإشهار بنسبة 66 فالمية مقارنة مع الفترة نفسها العام اللي فات، ووصلات لـ113 مليون دولار.