26/04/2024 09:44
جنايات فاس فرقات 30 عام ديال السجن فجلسة وحدا على متهمين بـ”السرقات الموصوفة”
سهام البارودي- كود//
و مازال شي وحدين بلا حشمة بلا حيا كايقولو ليك مابغيناش المرا تقرا !و لا خاصها تقرا غا شوية و تجلس فالدار تقابل وليداتها ! و مابغيناش المرا تخدم ! وا راس العجل ! وا راه غاتوحل فيك غا نتا فاللخر ! القراية مزيانة و الوعي مزيان سوا للراجل سوا للمرا و لكن للمرا اكثر و اكثر حيت لا ماقراتش ووعات كاتولي قنبلة ! الخطر ديالها اكبر من القنبلة النووية !
مؤخرا نتاشر الڤيديو ديال واحد الباطرونة اختصاصية فاليوتوب فداكشي ديال كيفاش ترضيه خاتم بين يديك ! كيفاش تطردي النحس ! كيفاش تقراي اللدون ! كيفاش تبعدي عليك العين … آخر الخرجات ديالها قاليك كيفاش تعبري بنتك تعرفيها واش عزبة و لا متقوبة بخيط ! وا شوف الجهل كي داير ! علاش غاتعبريها أصلا ؟ واش هي بهيمة كاتعبر ؟ واش صافي بنتك احسن حاجة فيها هي ديك التقبة تبقاي مقابلاها ليها ها هي خرجات اجي نعبرك ! هاهي مشات عند صاحبتها اجي نعبرك ! الكالاخ و الجهل و شوف كيفاش العيالات براسهم كايسترخصو راسهم و الجسد ديالهم.
في الوقت لي العيالات القاريات و الواعيات كايشجعو بناتهم على التفوق و النجاح و على انها تعتبر الجسد ديالها ملك خاص ليها، ماتخلي حتى واحد يتعدى ليها عليه، و على كيفاش خاصها تكون عندها تربية جنسية و ماتشوفش راسها سلعة بيد الراجل… في الوقت لي العيالات مركزات مع قراية بناتهم و مستقبلهم و تربيتهم الحسنة كاين شي باطرونات مقابلين غا التقابي !
كاتشوف راسها اقصى حلم عندها هي تجوج ديك البنت و تشارجيها بالشعوذة و الجهل ! كاتموت هي كاتخلي وراها خمسة ستة ديال البنات كايشبهو ليها نفس الجهل نفس الثقافة نفس الكالاخ هادشي علاش ماكانزيدوش للقدام !
العيالات فين وصلو ! قاضيات ! محاميات ! صحفيات ! سيدات اعمال و شي وحدات العام لي جا يلقاهم قارقين على تقبة !
