كود عن ال اسبانيول ///

واش ممكن نصدقوها هاد المرة. يومية “ال اسبانيول” الصبليونية ديما طالقة خبارات على العلاقات معانا كثير فيها ماشي دقيق ولا بصاح گاع. اخر ما خرجوه٬ هادي ثلاث سوايع وفيه ان المغرب حدد تاريخ مارس 2022 باش يرجع يفتح حدودو البرية مع اسبانيا فاشارة الى فتح باب سبتة والحدود مع مليلية.

اليومية قالت ان الوالي المكلف بالهجرة خالد الزروالي عطى اوامرو لسلطات الناظور وتطوان باش يوجدو هاد الشي.

هاد القضية ديال العلاقات المغربية الاسبانية مازال غامضة. رئيس الدولة قال باللي كاين تقدم والامور غادية مزيانة هادي اشهر ثم جا خطاب المسيرة وفيه باللي ما كاينة علاقة مع الدول اللي حاطة رجل معانا ورجل مع البوليساريو وباللي ما كاينش اتفاقيات مع شي دولة كتستثني الصحرا.

دابا المغرب مازال ما رجعش سفيرتو او عين شي وحدة اخرى وفنفس الوقت كاين تعاون امني فمحاربة الهجرة والارهاب.

ماشي غير الحدود اللي مقفولة حتى النقل البحري واقف بين الدولتين من بدات الجايحة وكملات مع الازمة اللي وقعات بين الرباط ومدريد.