كود بروكسيل ///
تجربة مظاهرة فرنسا اللي وقعت قبل يومين و تم الاعتداء فيها على سيدات مغربيات من طرف منتمين للبوليساريو بينات انه ماخص الجالية تنساق وراء دعوات الصفحات المجهولة اللي كتقول ليهم سيرو واجهو البوليساريو..
منطق التجييش ونسف وقفات قانونية للبوليساريو في اوروبا غير حكيم ولا عقلاني ويؤدي للتشويه والعنف والعنف المضاد.
البوليساريو ديما كايديرو وقفات حقهم هذاك..الجالية تمشي تاهي تطلب ترخيص ودير وقفة بعيد..اما اعلان الصفحات : راه كاينة وقفة وسيرو نسفوها، راه ماغادي يؤدي الا للمناظر المؤسفة اللي شفناها..وربما دابا حيث المغاربة هما جالية كبيرة العدد، ف الوقفات الجاية ديال البوليساريو غادي ينتقموا المغاربة اكثر منهم وهادشي مافيه فايدة في بلد مثل فرنسا المظاهرات دموية اصلا والبوليس عنيفين بزاف وكاين نقاش حول العنف البوليسي هاد الايامات.
بحال هاد الحوادث راه وقعت مثلا ف بلجيكا بين الجاليات التركية و الكردية بدات غير بمواجهات ف مظاهرت قبل ما يمشيو عناصر يحرقو مركز ثقافي تركي بينما ردو عليهم الاتراك بمحاولة قتل نشطاء اكراد..ماخصناش نوصلو لهاد المستوى ..كما انه مرفوض اعتداء البوليساريو على القنصليات راه مرفوض ارسال نساء و اطفال لمظاهرات فيها ناس لابسين حوايج العسكر ..
ورغم هذه الحوادث المؤسفة وزيرة الجالية نزهة الوافي دارت هاد الصباح تدوينة كتشجع فيها الجالية على هاد السلوك رغم انه يمكن مناصرة قضية الصحراء بالف طريقة اخرى..واش نفهمو أن من تدوينتها أن الدولة المغربية تتبنى هذه المظاهرات؟
الصحفي محمد بحسي المقيم في بلجيكا علق على الوزيرة قائلا: “هل تتحمل الحكومة تبعات ما وقع وقد يقع لهؤلاء المتظاهرين من جروح و اعتقال وحتى موت لا قدر الله؟
هل للحكومة ووزيرتها المكلفة بالمغاربة المقيمين بالخارج تصور وبرنامج لهذه المظاهرات والمظاهرات المضادة التي ينظمها مغاربة العالم المرخص منها والعشوائي؟
أم هي مجرد محاولة للركوب على الحماس الوطني لمغاربة العالم و دفاعهم التلقائي عن وحدة وطنهم الأم.. يتم نسيانه والتنكر له عند أول امتحان؟؟